ranj o alam kaa lutf uThaane ke vaaste — Jagdish Sahay Saxena

hui thi ik khataa sarzad so us ko muddatein guzrin
magar ab tak mire dil se pashemaani nahin jaati

hai ye taqdir ki khubi ki nigaah-e-mushtaaq
pardaa ban jaae agar parda-nashin tak pahunche

ulfat ki thiin dalil tiri bad-gumaaniyaan
ab bad-gumaan main huun ki tu bad-gumaan nahin

hujum-e-ranj-o-gham ne is qadar mujh ko rulaayaa hai
ki ab raahat ki surat mujh se pahchaani nahin jaati