ulfat ki thiin dalil tiri bad-gumaaniyaan — Jagdish Sahay Saxena

ranj o alam kaa lutf uThaane ke vaaste
raahat se bhi nibaah kiye jaa rahaa huun main

hui thi ik khataa sarzad so us ko muddatein guzrin
magar ab tak mire dil se pashemaani nahin jaati

hai ye taqdir ki khubi ki nigaah-e-mushtaaq
pardaa ban jaae agar parda-nashin tak pahunche

hujum-e-ranj-o-gham ne is qadar mujh ko rulaayaa hai
ki ab raahat ki surat mujh se pahchaani nahin jaati

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

kuchh khel nahin hai ishq karnaa
ye zindagi bhar kaa rat-jagaa hai

mujh ko dushman ke iraadon pe bhi pyaar aataa hai
tiri ulfat ne mohabbat miri aadat kar di

vaqt ki qabr mein ulfat kaa bharam rakhne ko
apni hi laash utaari hai tumhein kyaa maalum

qum-be-iznil-ishq se dil zinda karegaa
ye mujh se mohabbat ke masihaa ne kahaa hai