maiñ jo bolā kahā ki ye āvāz — Mir Taqi Mir

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ

kitnī bāteñ banā ke lā.ūñ lek
yaad rahtīñ tire huzūr nahīñ

shaam se kuchh bujhā sā rahtā huuñ
dil huā hai charāġh muflis kā

be-ḳhudī le ga.ī kahāñ ham ko
der se intizār hai apnā

dil se shauq-e-ruḳh-e-nikū na gayā
jhāñknā-tāknā kabhū na gayā

'mīr'-sāhib zamāna nāzuk hai
donoñ hāthoñ se thāmiye dastār