har december isi vahshat mein guzaaraa ki kahin — Rehana Roohi

kaun kahaan tak jaa saktaa hai
ye to vaqt bataa saktaa hai

— Rehana Roohi

main ye bhi chaahti huun tiraa ghar basaa rahe
aur ye bhi chaahti huun ki tu apne ghar na jaae

— Rehana Roohi

jo bhiik maangte hue bachche ke paas thaa
us kaasa-e-savaal ne sone nahin diyaa

— Rehana Roohi

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

— Asim Nadeem Asi

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

— Imdad Imam Asar

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar

khvaab Thahre the to aankhein bhigne se bach gaiin
varna chehre par to gham ki baarishon kaa aks hai

— Malika Naseem