dafn ham ho chuke to kahte hain — Sakhi Lakhnvi

ham un se aaj kaa shikva kareinge
ukhaaDeinge vo barson ki gaDi baat

na aashiq hain zamaane mein na maashuq
idhar ham rah gae hain aur udhar aap

baat karne mein honT laDte hain
aise takraar kaa khudaa-haafiz

dard ko gurda taDapne ko jigar
hijr mein sab hain magar dil to nahin

mire laashe ko kaandhaa de ke bole
chalo turbat mein ab tum ko sulaaein

ek do tiin chaar paanch chhe saat
yunhi gin leinge kam ke kyaa maani