یوں پریشاں کبھی ہم بھی تو نہ تھے ایسے اس زلف میں خم بھی تو نہ تھے سیر گلشن کو گئے تھے جب آپ یاد تو کیجئے ہم بھی تو نہ تھے ہم سے بے جرم وہ کوچہ چھوٹا شائق باغ ارم بھی تو نہ تھے رحم کرتا نہ فلک کیا کرتا ہم سزا وار ستم بھی تو نہ تھے رہتے کعبہ میں اکیلے کیا ہم دل لگانے کو صنم بھی تو نہ تھے ہاتھ کیوں سر پہ ہمارے رکھا تم سے خواہان قسم بھی تو نہ تھے

yuun pareshaan kabhi ham bhi to na the

غزل · Ghazal

رخ روشن دکھائیے صاحب شمع کو کچھ جلائیے صاحب روح ہو کر سمائیے صاحب میرے قالب میں آئیے صاحب شیخ جی ہو تمہیں سرود حرام آپ اپنی نہ گائیے صاحب وصل کی شب قریب آئی ہے اب نہ مہندی لگائیے صاحب خون عشاق ہے معانی میں شوق سے پان کھائیے صاحب میں تجلی طور دیکھوں گا آج کوٹھے پہ آئیے صاحب آپ دل میں بگاڑ رکھتے ہیں بس نہ باتیں بنائیے صاحب چشم تر رونے پر ہے آمادہ اور سوکھی سنائیے صاحب بوسۂ رخ تو چاہتے ہو سخیؔ کہیں منہ کی نہ کھائیے صاحب

rukh-e-raushan dikhaaiye saahab

غزل · Ghazal

نہ بچپن میں کہو ہم کو کڑی بات نہ کھلواؤ کہ چھوٹا منہ بڑی بات سنو تو گوہر دنداں کی تعریف ابھی ہو جائے موتی کی لڑی بات بڑے اندھیر کی تزئین ہے آج نہ ہونے دے گی مسی کی دھڑی بات جہاں اغیار ان کے پاس بیٹھے وہیں بس ہو گئی کوئی گھڑی بات پیام وصل پر وہ ہو گئے ترش غضب آیا کھٹائی میں پڑی بات ہم ان سے آج کا شکوہ کریں گے اکھاڑیں گے وہ برسوں کی گڑی بات طبیعت ان کی ہے کچھ اکھڑی اکھڑی کسی نے پھر وہاں میری جڑی بات یہ کس مژگاں کی برچھی کا تھا مذکور انی ہو کر کلیجہ میں اڑی بات سخیؔ وہ یوں تو بولیں گے نہ ہم سے کبھی ہو جائے گی دھوکھے دھڑی بات

na bachpan mein kaho ham ko kaDi baat

غزل · Ghazal

دل اسے دے دیا سخیؔ ہی تو ہے مرحبا پرورش علی ہی تو ہے دل دیا ہے دلاوری ہی تو ہے جان بھی اس کو دیں گے جی ہی تو ہے کیوں حسینوں کی آنکھ سے نہ لڑے میری پتلی کی مردمی ہی تو ہے نہ ہوئی ہم سے عمر بھر سیدھی ابروئے یار کی کجی ہی تو ہے عارض اس کا نہ دیکھوں مر جاؤں زندگی میری عارضی ہی تو ہے نہ ہنسے وہ نہ گل دہن کا کھلا ابھی نام خدا کلی ہی تو ہے کی خطابت کو گر خدا سمجھا بندہ بھی آخر آدمی ہی تو ہے گال میں واں ہوا کے صدمہ سے پڑ گیا نیل نازکی ہی تو ہے آج کیوں چونک چونک پڑتے ہو اس مکاں میں فقط سخیؔ ہی تو ہے

dil use de diyaa 'sakhi' hi to hai

غزل · Ghazal

عشق کرنے میں دل بھی کیا ہے شوخ سیکڑوں میں سے اک چنا ہے شوخ یہ بھی شوخی نئی نکالی ہے آج دشمن سے کچھ خفا ہے شوخ اپنی آنکھوں میں رات دن رکھ کر میں نے خود اس کو کر دیا ہے شوخ اشک خوں میرے دیکھ کر بولے اس سے تو کچھ مری حنا ہے شوخ آنکھ سے گر کے گود میں مچلا طفل اشک ایسا ہو گیا ہے شوخ بوسہ ہر وقت رخ کا لیتا ہے کس قدر گیسوئے دوتا ہے شوخ چھیڑتی ہے تمہارے زلفوں کو کس بلا کی مگر صبا ہے شوخ بر میں آئینہ کے لیا نہ قرار جان من عکس بھی ترا ہے شوخ پھر گئی دور سے دکھا کے جھلک ہجر میں اے سخیؔ قضا ہے شوخ

'ishq karne mein dil bhi kyaa hai shokh

Similar Poets