kachchi divaaron ko paani ki lahar kaaT gai — Zubair Rizvi

gulaabon ke honTon pe lab rakh rahaa huun
use der tak sochnaa chaahtaa huun

— Zubair Rizvi

surkhiyaan akhbaar ki galiyon mein ghul karti rahin
log apne band kamron mein paDe sote rahe

— Zubair Rizvi

auraton ki aankhon par kaale kaale chashme the sab ki sab barahana thiin
zaahidon ne jab dekhaa saahilon kaa ye manzar likh diyaa gunaahon mein

— Zubair Rizvi

sukhan ke kuchh to guhar main bhi nazr kartaa chalun
ajab nahin ki karein yaad maah o saal mujhe

— Zubair Rizvi

zindagi jin ki rifaaqat pe bahut naazaan thi
un se bichhDi to koi aankh mein aansu bhi nahin

— Zubair Rizvi

ye lamha lamha takalluf ke TuTte rishte
na itne paas mire aa ki tu puraanaa lage

— Zubair Rizvi

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

chaand ne taan li hai chaadar-e-abr
ab vo kapDe badal rahi hogi

— Jaun Elia

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

— Nazeer Akbar Abadi