All Writings Of Abdul Rahman Khan Wasfi Bahraichi

"maiñ jāntā huuñ kaun huuñ maiñ aur kyā huuñ maiñ duniyā samajh rahī hai ki ik pārsā huuñ maiñ ab mujh meñ aur tujh meñ koī fāsla nahīñ tū merā mudda.ā hai tirā mudda.ā huuñ maiñ vaa.iz jabīn-e-shauq jhuke to kahāñ jhuke naqsh-e-qadam hī un ke abhī DhūñDhtā huuñ maiñ dil ko tajalliyāt kā markaz banā liyā ab un kā naam lene ke qābil huā huuñ maiñ nāseh tirī nigāh meñ bāda-parast huuñ mai-kash samajh rahe haiñ baḌā pārsā huuñ maiñ fursat mile kashākash-e-duniyā se to kahūñ kis vahm kis gumān meñ uljhā huā huuñ maiñ ahl-e-ḳhirad kī aql pahuñchtī nahīñ jahāñ 'vasfī' junūñ meñ aisī jagah aa gayā huuñ maiñ"

"itnā to karam mujh par allāh tū farmā de duniyā ko mohabbat kī ḳhushbū se tū mahkā de pāband-e-salāsil kyoñ dīvāne ko kartā hai dīvāne ke qadmoñ ko ab vus.at-e-sahrā de dāmān-e-talab apnā itnā na kushāda kar denā ho jise soche de is ko to kyā kyā de saaqī kī nigāhoñ kī mastī mujhe kaafī hai allāh mujhe phir kyoñ fikr-e-mai-o-mīnā de vo soz-o-gudāz-e-dil ab ham meñ kahāñ baaqī jo ruuh ko taḌpā de jo qalb ko garmā de ka.abe meñ tujhe DhūñDūñ yā dair-o-kalīsā meñ pā.ūñ maiñ kahāñ tujh ko ab kuchh to ishāre de dil rāhat-e-sāhil kā qaa.il hī nahīñ 'vasfī' denā hai agar mujh ko to shorish-e-dariyā de"

"dil un kī mohabbat kā jo dīvāna lage hai ye aisī haqīqat hai jo afsāna lage hai aalam na koī pūchhe mirī vahshat-e-dil kā ghar apne agar jā.ūñ to vīrāna lage hai baḌhte nahīñ kyuuñ mere qadam aage kī jānib nazdīk hī shāyad dar-e-jānāna lage hai vaise to kisī ne mujhe aisā nahīñ jaanā dīvāna kahā tum ne to dīvāna lage hai rūdād-e-alam un se jo qāsid ne bayāñ kī farmāne lage hañs ke ye afsāna lage hai maiñ ne to banā.ī thī faqat aap kī tasvīr dil merā magar aaj sanam-ḳhāna lage hai ab apnā bhī begāna nazar aatā hai 'vasfī' begāna to begāna hai begāna lage hai"

"mohabbat kā jise irfāñ nahīñ hai vo sab kuchh hai magar insāñ nahīñ hai shu.ūr-e-zindagī par miTne vaalo shu.ūr-e-zindagī āsāñ nahīñ hai talab kā haath baḌhtā jā rahā hai ḳhayāl-e-vus.at-e-dāmāñ nahīñ hai ḳhafā be-vaj.h nāseh ho rahe ho tumhārī baat kuchh qur.āñ nahīñ hai vo mast-e-hāl hai 'vasfī' ki us ko ġham-e-dil hai ġham-e-daurāñ nahīñ hai"

"koī nazr-e-ġham-e-hālāt na hone paa.e aur har baat ho ye baat na hone paa.e jo bhī sūrat hai ināyat hai karam hai un kā rā.egāñ un kī ye sauġhāt na hone paa.e un kī tasvīr se har lamha rahe rāz-o-niyāz muntashir shān-e-ḳhayālāt na hone paa.e saḳht dushvār hai pābandi-e-ā.īn-e-vafā baat to jab hai tujhe maat na hone paa.e jaan de dījiye ādāb-e-mohabbat ke liye dekhiye ḳhāmī-e-jazbāt na hone paa.e bazm meñ un kā koī zikr jo aa jaatā hai hukm hotā hai mirī baat na hone paa.e husn-e-kirdār se hastī ko sajā lo 'vasfī' zindagī nazr-e-ḳhurāfāt na hone paa.e"

"karte nahīñ jafā bhī vo tark-e-vafā ke saath ye kaun sā sitam hai dil-e-mubtalā ke saath ab vo jabīn-e-shauq kahīñ aur kyuuñ jhuke vābasta ho ga.ī jo tire naqsh-e-pā ke saath vārafta-e-jamāl kā aalam na pūchhiye dīvāna-vār uThtī haiñ nazreñ sadā ke saath surḳhī tumhāre haath kī kahtī hai saaf saaf shāmil hai mere dil kā lahū bhī hinā ke saath takmīl-e-ārzū kī ḳhushī aur ġham-e-hayāt donoñ hī ibtidā se rahe intihā ke saath shāmil mirī hayāt meñ yuuñ hai ġham-e-hayāt jaise ḳhabar ho apne kisī mubtadā ke saath 'vasfī' mirī hayāt ne manzil ko pā liyā kuchh din guzār aayā jo ik pārsā ke saath"

"ġham se ghabrā ke kabhī nāla-o-fariyād na kar izzat-e-nafs kisī haal meñ barbād na kar dil ye kahtā hai ki de iiñT kā patthar se javāb jo tujhe bhūle use tū bhī kabhī yaad na kar toḌ de band-e-qafas kuchh bhī agar himmat hai ik rihā.ī ke liye minnat-e-sayyād na kar apne hālāt ko behtar jo banānā hai tujhe ahd-e-rafta ko kabhī bhuul ke bhī yaad na kar haal ko dekh samajh vaqt kī qīmat ai dost fikr-e-fardā meñ kabhī vaqt ko barbād na kar zindagī bantī hai kirdār se kirdār banā muḳhtasar ziist ke lamhāt ko barbād na kar kabhī badlā hai na badlegā mohabbat kā mizāj ahl-e-dil hai to kisī dil ko bhī nāshād na kar mudda.ī ilm kā hai jehl-e-murakkab lā-raib qaul faisal hai farāmosh ye irshād na kar"

"adab meñ mudda.ī-e-fan to be-shumār mile magar na 'mīr' ke 'ġhālib' ke virsa-dār mile junūn-e-ishq ko dāman to taar taar milā mazā to jab hai garebāñ bhī taar taar mile baḌe maze se guzārī hai zindagī maiñ ne ḳhudā ke fazl se hālāt sāzgār mile kisī ke dil pe bhalā iḳhtiyār kyā hogā bahut hai apne hī dil par jo iḳhtiyār mile ye kyā sitam hai ki aadā to paa.eñ hūr-o-qusūr jo un ke chāhne vaale haiñ un ko daar mile mire mizāj ko baḳhshā hai inkisār agar ba-qadr-e-zarf tabī.at ko inkisār mile har ik amal pe mukallaf banā ke farmāyā kahīñ se dekhnā dāman na dāġh-dār mile mirā mazāq hai ikrām-e-dostāñ 'vasfī' vo dil hī paas nahīñ jis meñ kuchh ġhubār mile"

"kyā kyā supurd-e-ḳhāk hue nāmvar tamām ik roz sab ko karnā hai apnā safar tamām merī nazar ne luuT liye jalva-hā-e-husn hasrat se dekhte hī rahe dīda-var tamām tum ne to apnā kah ke mujhe luuT hī liyā mātam-kunāñ hai mere liye ghar kā ghar tamām maanā ki mere lab na hile ro.ab-e-husn se rūdād-e-dil to kah hī ga.ī chashm-e-tar tamām ab dīdanī hai aap ke bīmār-e-ġham kā haal māyūs aa rahe haiñ nazar chāra-gar tamām rāh-e-vafā meñ had se ham aage guzar ga.e do-gām chal ke baiTh ga.e rāhbar tamām chhoḌe haiñ ham ne naqsh-e-mohabbat har ik jagah vāqif hamāre haal se haiñ bām-o-dar tamām"

"kaash samajhte ahl-e-zamāna kyā hai haqīqat kyā hai fasāna ishq kā sheva husn kī fitrat ek haqīqat ek fasāna rāh-e-vafā dushvār bahut hai soch samajh kar paañv baḌhānā tum na ho jis ke kaun ho us kā jis ke hue tum us kā zamāna rahrav-e-rāh-e-ishq-o-mohabbat jaan to denā lab na hilānā pahlu-e-gul meñ ḳhaar nihāñ haiñ gulchīñ apnā haath bachānā ham ne to 'vasfī' paayā hai un ko jalva-ba-jalva ḳhāna-ba-ḳhāna"

"yuuñ ashk baraste haiñ mire dīda-e-tar se jis tarah se sāvan kī ghaTā jhuum ke barse haañ ashk-e-nadāmat jo gire dīda-e-tar se vo dāman-e-isyāñ pe nazar aa.e guhar se māhaul to badlā hai mirī jehd ne aksar haañ maiñ nahīñ badlā kabhī māhaul ke Dar se duniyā na kahīñ mujh ko nigāhoñ se girā de ab itnā girā do na mujhe apnī nazar se dekhe jo koī sāda-mizājī to ye samjhe vāqif hī nahīñ aap kisī aib-o-hunar se jis raah meñ guzrī hai mire sar pe qayāmat sau baar to guzrā huuñ usī rāhguzar se is vaqt jo guzrī hai na pūchho use 'vasfī' Takrā.ī hai jab un kī nazar merī nazar se"

"jiit kar bāzī-e-ulfat ko bhī haarā jaa.e is tarah husn ko shīshe meñ utārā jaa.e ab to hasrat hai ki barbād kiyā hai jis ne us kā dīvāna mujhe kah ke pukārā jaa.e aap ke husn kī tausīf se maqsad hai mirā naqsh-e-fitrat ko zarā aur ubhārā jaa.e tum hī batlāo ki jab apne hī begāne haiñ dahr meñ apnā kise kah ke pukārā jaa.e zehn-e-ḳhuddār pe ye baar hī ho jaatā hai ġhair ke sāmne dāman jo pasārā jaa.e kitnī dushvār hai pābandi-e-ā.īn-e-vafā aah bhī lab pe agar aa.e to maarā jaa.e shab to kaT jā.egī yādoñ ke sahāre 'vasfī' fikr is kī hai ki din kaise guzārā jaa.e"