Shayari Of Afzal Hazarvi

"hairat kā imkān banātā rahtā huuñ kuchh manzar vīrān banātā rahtā huuñ koī to in meñ phuul sajāne aa.egā saarā din guldān banātā rahtā huuñ patthar jaise ḳhvāb sajā.ūñ āñkhoñ meñ miTTī ke armān banātā rahtā huuñ ik adnā sā shā'ir huuñ maiñ lākhoñ meñ apnī ik pahchān banātā rahtā huuñ ban jaatī hai jab us kī tasvīr to phir hoñToñ par muskān banātā rahtā huuñ gaañv kī jab jab yaad satātī hai 'afzal' khet shajar dahqān banātā rahtā huuñ"

"hausle kyā us but-e-be-jān ke saare jhagḌe haiñ dil-e-nādān ke naaz hai kis baat par insān ko kis tarah chaltā hai siina taan ke khet jal-thal kar diye sailāb ne mar ga.e armān sab dahqān ke de rahe haiñ maat ab shaitān ko kārnāme hazrat-e-insān ke chhup-chhupā ke vaar ham karte nahīñ ham khilāḌī haiñ khule maidān ke jab se badlī haiñ nigāheñ yaar ne paḌ ga.e haiñ laale 'afzal' jaan ke"

"bedārī meñ sote ḳhvāb dekhe pāgal hote ḳhvāb terī aañkh meñ rahte ham yaar agar ham hote ḳhvāb jaane ab kis haal meñ huuñ chhoḌ aa.e the rote ḳhvāb ta.abīroñ se aarī the kaise kāmil hote ḳhvāb muskātī āñkhoñ meñ aksar dekhe ham ne rote ḳhvāb kuchh na kuchh mil jaatā phal kaash zamīñ meñ bote ḳhvāb 'afzal' itnā shor na kar jaag na jaa.eñ sote ḳhvāb"

"ḳhvāb ban kar har ḳhushī rah jā.egī bin tire kyā zindagī rah jā.egī hijr kī manzar-kashī rah jā.egī aañkh meñ yaaro namī rah jā.egī panchhī saare peḌ se uḌ jā.eñge sahn meñ ik ḳhāmushī rah jā.egī yuuñ to sab hī log hoñge bazm meñ tū na hogā to kamī rah jā.egī jaane vaalā lauT kar na aa.egā aañkh dar par hī jamī rah jā.egī phir kahāñ afzal ḳhulūs-e-dostāñ naam kī jab dostī rah jā.egī"

"baa'd muddat ke mujh se milā aa.ina dekh kar mujh ko hairāñ huā aa.ina us ne mujh se ta'alluq kiyā munqata’ jis kisī ko bhī maiñ ne diyā aa.ina jā-ba-jā 'aks merā thā bikhrā huā haath se jab mire gir gayā aa.ina us ko banñe-sañvarne se fursat nahīñ haath us ke hai jab se lagā aa.ina roz dekhūñ maiñ chehra ḳharāshoñ bharā roz dene lagā hai sazā aa.ina har koī mujh se nazreñ churāne lagā jab se 'afzal' maiñ jag meñ banā aa.ina"

"purāne sab nazāre jā rahe haiñ na.e manzar ubhāre jā rahe haiñ udhar hai sard-mehrī aur idhar se ishāroñ par ishāre jā rahe haiñ safīna ho rahā hai ġharq-e-tūfāñ nigāhoñ se kināre jā rahe haiñ nahīñ bātin pe ab koī tavajjoh faqat zāhir sañvāre jā rahe haiñ shab-e-ġham meñ ruḳh-e-raushan ke jalve añdheroñ ko nikhāre jā rahe haiñ kahīñ bikhrī paḌī hai zulf 'afzal' kahīñ gesū sañvāre jā rahe haiñ"

"pā-pyāda chaltā huuñ be-irāda chaltā huuñ thak na jā.ūñ is liye maiñ ziyāda chaltā huuñ chashm-kor bastī meñ be-libāda chaltā huuñ raste hairat karte haiñ itnā saada chaltā huuñ ho na jā.ūñ puurā maiñ aadhā aadhā chaltā huuñ muflisī meñ kar ke maiñ dil kushāda chaltā huuñ 'afzal' aas ke raste par be-murada chaltā huuñ"

"yādoñ kī jāgīr na hotī to maiñ yaaro kyā kartā gar us kī tasvīr na hotī to maiñ yaaro kyā kartā us ke dam se rāñjhā thā maiñ vo hī mirī pahchān banī vo gar merī hiir na hotī to maiñ yaaro kyā kartā qaa.il karnā kaam thā mushkil par vo qaa.il ho hī gayā lahje meñ tāsīr na hotī to maiñ yaaro kyā kartā merā kaam tamām thā varna us ke nek irāde se hāthoñ meñ shamshīr na hotī to maiñ yaaro kyā kartā andar se maiñ TūTā-phūTā ek khañDar vīrāna thā zāhir jo ta.amīr na hotī to maiñ yaaro kyā kartā zulmat-e-shab meñ raushan 'afzal' ik nanhā sā jugnū thā itnī bhī tanvīr na hotī to maiñ yaaro kyā kartā"

"aañkh se 'adāvat kī niiñd ne baġhāvat kī us kitābī chehre kī rāt-bhar tilāvat kī be-hijāb hone par aap ne qayāmat kī aap chup rahe lekin aañkh ne jasārat kī dekh kar hamārī or aap ne 'ināyat kī mom the magar 'afzal' aag se mohabbat kī"

khet jal-thal kar diye sailāb ne
mar ga.e armān sab dahqān ke

ik adnā sā shā'ir huuñ maiñ lākhoñ meñ
apnī ik pahchān banātā rahtā huuñ

safīna ho rahā hai ġharq-e-tūfāñ
nigāhoñ se kināre jā rahe haiñ