aankh se 'adaavat ki — Afzal Hazarvi

"baa'd muddat ke mujh se milaa aaina dekh kar mujh ko hairaan huaa aaina us ne mujh se ta'alluq kiyaa munqata’ jis kisi ko bhi main ne diyaa aaina jaa-ba-jaa 'aks meraa thaa bikhraa huaa haath se jab mire gir gayaa aaina us ko banne-sanvarne se fursat nahin haath us ke hai jab se lagaa aaina roz dekhun main chehra kharaashon bharaa roz dene lagaa hai sazaa aaina har koi mujh se nazrein churaane lagaa jab se 'afzal' main jag mein banaa aaina"

"paa-pyaada chaltaa huun be-iraada chaltaa huun thak na jaaun is liye main ziyaada chaltaa huun chashm-kor basti mein be-libaada chaltaa huun raste hairat karte hain itnaa saada chaltaa huun ho na jaaun puuraa main aadhaa aadhaa chaltaa huun muflisi mein kar ke main dil kushaada chaltaa huun 'afzal' aas ke raste par be-murada chaltaa huun"

"bedaari mein sote khvaab dekhe paagal hote khvaab teri aankh mein rahte ham yaar agar ham hote khvaab jaane ab kis haal mein huun chhoD aae the rote khvaab taabiron se aari the kaise kaamil hote khvaab muskaati aankhon mein aksar dekhe ham ne rote khvaab kuchh na kuchh mil jaataa phal kaash zamin mein bote khvaab 'afzal' itnaa shor na kar jaag na jaaein sote khvaab"

"khvaab ban kar har khushi rah jaaegi bin tire kyaa zindagi rah jaaegi hijr ki manzar-kashi rah jaaegi aankh mein yaaro nami rah jaaegi panchhi saare peD se uD jaaeinge sahn mein ik khaamushi rah jaaegi yuun to sab hi log honge bazm mein tu na hogaa to kami rah jaaegi jaane vaalaa lauT kar na aaegaa aankh dar par hi jami rah jaaegi phir kahaan afzal khulus-e-dostaan naam ki jab dosti rah jaaegi"

"hausle kyaa us but-e-be-jaan ke saare jhagDe hain dil-e-naadaan ke naaz hai kis baat par insaan ko kis tarah chaltaa hai siina taan ke khet jal-thal kar diye sailaab ne mar gae armaan sab dahqaan ke de rahe hain maat ab shaitaan ko kaarnaame hazrat-e-insaan ke chhup-chhupaa ke vaar ham karte nahin ham khilaaDi hain khule maidaan ke jab se badli hain nigaahein yaar ne paD gae hain laale 'afzal' jaan ke"

"puraane sab nazaare jaa rahe hain nae manzar ubhaare jaa rahe hain udhar hai sard-mehri aur idhar se ishaaron par ishaare jaa rahe hain safina ho rahaa hai gharq-e-tufaan nigaahon se kinaare jaa rahe hain nahin baatin pe ab koi tavajjoh faqat zaahir sanvaare jaa rahe hain shab-e-gham mein rukh-e-raushan ke jalve andheron ko nikhaare jaa rahe hain kahin bikhri paDi hai zulf 'afzal' kahin gesu sanvaare jaa rahe hain"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"