Wafa

jo talab pe ahd-e-vafaa kiyaa to vo aabru-e-vafaa gai
sar-e-aam jab hue muddai to savaab-e-sidq-o-vafaa gayaa

rahegaa saath tiraa pyaar zindagi ban kar
ye aur baat miri zindagi vafaa na kare

ab jafaa se bhi hain mahrum ham allaah allaah
is qadar dushman-e-arbaab-e-vafaa ho jaanaa

chalaa thaa zikr zamaane ki bevafaai kaa
so aa gayaa hai tumhaaraa khayaal vaise hi

main ne chaahaa thaa ki andoh-e-vafaa se chhuTun
vo sitamgar mire marne pe bhi raazi na huaa

DhunD ujDe hue logon mein vafaa ke moti
ye khazaane tujhe mumkin hai kharaabon mein milein

kisi bevafaa ki khaatir ye junun 'faraaz' kab tak
jo tumhein bhulaa chukaa hai use tum bhi bhuul jaao

us bevafaa ne ham ko agar apne ishq mein
rusvaa kiyaa kharaab kiyaa phir kisi ko kyaa

us ke yuun tark-e-mohabbat kaa sabab hogaa koi
ji nahin ye maantaa vo bevafaa pahle se thaa

bevafaai pe teri ji hai fidaa
qahr hotaa jo baa-vafaa hotaa

lo phir tire labon pe usi bevafaa kaa zikr
ahmad 'faraaz' tujh se kahaa na bahut huaa

phir usi bevafaa pe marte hain
phir vahi zindagi hamaari hai

is qadar musalsal thiin shiddatein judaai ki
aaj pahli baar us se main ne bevafaai ki

rishton kaa e'tibaar vafaaon kaa intizaar
ham bhi charaagh le ke havaaon mein aae hain

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa

kyaa maslahat-shanaas thaa vo aadmi 'qatil'
majburiyon kaa jis ne vafaa naam rakh diyaa

us ke ifaa-e-ahd tak na jiye
umr ne ham se bevafaai ki

is se pahle ki be-vafaa ho jaaein
kyuun na ai dost ham judaa ho jaaein

haan vo nahin khudaa-parast jaao vo bevafaa sahi
jis ko ho diin o dil aziiz us ki gali mein jaae kyuun

ki vafaa ham se to ghair is ko jafaa kahte hain
hoti aai hai ki achchhon ko buraa kahte hain