Shayari Of Azra Naqvi

aane vaale kal kī ḳhātir har har pal qurbān kiyā
haal ko dafnā dete haiñ ham jiine kī tayyārī meñ

"dil ko har surma.ī rut meñ yahī samjhāte haiñ aise mausam ka.ī aate haiñ guzar jaate haiñ had se baḌh jaatī hai jab talḳhī-e-imroz to phir ham kisī aur zamāne meñ nikal jaate haiñ rāt-bhar niiñd meñ chalte haiñ bhaTakte haiñ ḳhayāl sub.h hotī hai to thak haar ke ghar aate haiñ kaise ghabrā.e se phirte haiñ mire ḳhaal ġhazāl zindagānī kī kaḌī dhuup meñ sañvlāte haiñ phuul se log jo ḳhushbū ke safar par nikle dekhte dekhte kis tarah se murjhāte haiñ chhoḌiye jo bhī huā Thiik huā biit gayā aa.iye raakh se kuchh ḳhvāb uThā laate haiñ"

"kis kī parchhā.īñ mire saath safar kartī hai kaun hai ye jo mirī umr basar kartī hai ḳhvāb ke shahr banātī hai mirī ik hamrāz aur phir ḳhud hī mujhe shahr-badar kartī hai koī āvāz kahīñ DhūñDhtī phirtī hai mujhe intizār arse se ik rāhguzar kartī hai isī ummīd pe likhtī huuñ hadīs-e-dil-e-zār dil se niklī huī har baat asar kartī hai lafz-o-ma.anī ke samundar meñ koī sā.at-e-nūr kisī taḳhlīq ke lamhe ko guhar kartī hai"

"bahut dinoñ se hamārā ḳhvāboñ se koī bhī rābta nahīñ hai kuchh aise kār-e-jahāñ meñ kho.e ki apnā bhī kuchh pata nahīñ hai ye nā-umīdī kī intihā hai ki āgahī kī hai koī manzil ye dil ko kyā āriza huā hai ise kisī se gila nahīñ hai hamesha sach bolne kī aadat hai kyā kareñ bolte raheñge qadam qadam par hai āzmā.ish ki sahl ye marhala nahīñ hai ham un kī har baat maan lete to zindagī chain se guzartī bas izzat-e-nafs roktī hai anā kā ye mas.ala nahīñ hai yūñhī bhaTakte phireñge kab tak ḳhud apne andar talāsh kar leñ jahāñ mukammal sukūñ mayassar ho aisī koī jagah nahīñ hai bas ik pareshāñ hujūm ke saath ham bhī shāmil haiñ chal rahe haiñ na koī naqsh-e-qadam salāmat kahīñ koī rāsta nahīñ hai ye shaam itnī udaas kyoñ hai kahīñ koī hādisa huā hai ye ḳhuuñ kī surḳhī shafaq ke rangoñ meñ ghul ga.ī be-vajah nahīñ hai sitāra-e-sub.h DhūñDte haiñ ġhubār-ālūda mausamoñ meñ nazar se ojhal to ho gayā hai magar abhī gum-shuda nahīñ hai"

"ye dil bas meñ kabhī mere rahā na.iiñ kabhī yādoñ kā dāman chhoḌtā na.iiñ bhulā.eñ kaise amrohe kī galiyāñ abhī lahje se amroha gayā na.iiñ yahīñ gum-karda apnā āshiyāñ thā jahāñ baaqī koī ab āshnā na.iiñ shikasta ho chuke mehrāb-o-dar sab abhī tak zehn se naqsha gayā na.iiñ hamāre naam kī taḳhtī nahīñ hai magar vo ghar to ḳhvāboñ se gayā na.iiñ maiñ samjhūñ huuñ tumhārī be-qarārī miyāñ guzrā zamāna lauTtā na.iiñ kisī saffāk hijrat ke sitam se zamīñ se apnā rishta TūTtā na.iiñ tumhārī shā.irāna be-ḳhudī ko kisī sarhad pe koī roktā na.iiñ bahut thī dhuum jashn-e-reḳhta meñ tumhāre naam kī tum ne sunā na.iiñ tumhārī shā.irī par sar dhune haiñ magar ye log urdu āshnā na.iiñ paḌī hai shā.irī ghuTTī meñ 'azrā' magar kuchh mo'atabar ab tak kahā na.iiñ"

"dāstān-e-zindagī likhte magar rahne diyā us ke har kirdār ko bas mo'atabar rahne diyā koī manzil koī mafrūza na thā pesh-e-nazar zer-e-pā ik rah-guzar thī rahguzar rahne diyā dil ke har mausam ne baḳhshī daulat-e-ehsās-o-dard sirf is sarmā.e ko zād-e-safar rahne diyā saath ik ḳhush-bāsh lahja mahfiloñ meñ le ke aa.e dil kī vīrānī ko tanhā apne ghar rahne diyā shor kartī bhāgtī duniyā meñ shāmil bhī rahe ek sur maddham sā dil ke saaz par rahne diyā vaqt ke bahte hue dariyā pe kashtī Daal kar saare andeshoñ se ḳhud ko be-ḳhabar rahne diyā ḳhud-ġharaz thoḌā sā honā bhī zarūrī thā magar tajraboñ se siikh kar bhī ye hunar rahne diyā saarī duniyā ke liye har shab duā-e-ḳhair kī zikr apnī ḳhvāhishoñ kā muḳhtasar rahne diyā kyuuñ koī dekhe hamāre dil kī saarī mumlikat ik jhalak dikhlā.ī hai aur beshtar rahne diyā kaun dāman-gīr hai aksar ye kartā hai savāl kar to saktīñ thiiñ bahut kuchh tum magar rahne diyā"

"airport station saḌkoñ par haiñ kitne saare log jaane kaun se sukh kī ḳhātir phirte maare maare log shaam ga.e ye manzar ham ne mulkoñ mulkoñ dekhā hai ghar lauTeñ bojhal qadmoñ se bujhe hue añgāre log sab se shākī ḳhud se nālāñ apnī aag meñ jalte haiñ dukh ke sivā aur kyā bāñTeñge in jaise añdhiyāre log pur-nam āñkhoñ bojhal dil se kitnī baar vidā.ī lī kitnā bojh liye phirte haiñ ham jaise banjāre log vo kitne ḳhush-qismat the jo apne gharoñ ko lauT ga.e shahroñ shahroñ ghuum rahe haiñ ham hālāt ke maare log raat ga.e yādoñ ke jañgal meñ dīvālī hotī hai diip sajā.e aa jaate haiñ bhūle bisre pyāre log bachpan kitnā pyārā thā jab dil ko yaqīñ aa jaatā thā marte haiñ to ban jaate haiñ āsmān ke taare log"

"mo'tabar se rishtoñ kā sā.ebān rahne do mehrbāñ duāoñ meñ ḳhāndān rahne do muzmahil se bām-o-dar ḳhasta-hāl dīvāreñ baap kī nishānī hai vo makān rahne do phailte hue shahro apnī vahshateñ roko mere ghar ke āñgan par āsmān rahne do aane vaalī nasleñ ḳhud hal talāsh kar leñgī aaj ke masā.il ko ḳhush-gumān rahne do uljhe uljhe resham kī Dor se bañdhe rishte har ghaḌī mohabbat kā imtihān rahne do kyā bahut zarūrī hai saarī baat kah Dāleñ jugnuoñ se kuchh lamhe darmiyān rahne do"

"ik muddat ke baa'd milī ehsās jagātī tanhā.ī ḳhāmoshī se dhīre dhīre ghar mahkātī tanhā.ī āvāzoñ kī bhiiḌ meñ jab bhī mujh ko pareshāñ dekhā hai haath pakaḌ kar le aa.ī hai kuchh samjhātī tanhā.ī āñkhoñ se jab niiñd bhaTak kar sahrā sahrā ghūmtī hai mere sirhāne raat ga.e tak lorī gaatī tanhā.ī bachpan meñ jab garm do-pahrī nange paañv phirtī thī aam ke bāġhoñ meñ miltī thī ras barsātī tanhā.ī pyaar kī ḳhvāb-rutoñ meñ kaisī jaagī soī rahtī thī chāñd hiñDole meñ jhūlī thī jab madh-mātī tanhā.ī pahroñ ham ne bāteñ kī haiñ pahroñ ḳhvāb sajā.e haiñ maiñ roī to mujh se chhup kar ashk bahātī tanhā.ī bahut dinoñ ke baa'd sañvar kar apnā chehra dekhā thā ā.īne se jhāñk rahī thī aañkh churātī tanhā.ī"

"kabhī ik nayā āsmān DhūñDhtī huuñ kabhī koī jā-e-amāñ DhūñDhtī huuñ vo ik ḳhvāb jo maiñ ne dekhā nahīñ thā ab us ḳhvāb kī dhajjiyāñ DhūñDhtī huuñ mujhe merī hastī se āzād kar de vo ik lamha-e-jāvedāñ DhūñDhtī huuñ adākār chehroñ kī gahrā.iyoñ meñ kahīñ sach kī parchhā.iyāñ DhūñDhtī huuñ jo patthar se alfāz meñ jaan Daale vo andāz-e-sehrul-bayāñ DhūñDhtī huuñ nahīñ koī dīvār-e-girya mayassar koī meherbāñ rāz-dāñ DhūñDhtī huuñ"

"har raat sitāroñ kā safar mere liye hai har roz na.ī taaza sahar mere liye hai ik shahr-e-tilismāt mujhe DhūñD rahā hai bechain koī rāhguzar mere liye hai jab chāhūñ taḳhayyul se kisī daur meñ jī luuñ lamhoñ meñ ye sadiyoñ kā safar mere liye hai kahte haiñ samundar meñ ka.ī raaz chhupe haiñ sandes liye koī bhañvar mere liye hai guzre hue fankāroñ kī mīrās milī hai un sab kī riyāzat kā samar mere liye hai shikve to bahut tujh se haiñ ai jaan magar tū chhitnār mohabbat kā shajar mere liye hai"

"aadhī jaagī aadhī soī raat bhī thī gahnā.ī sī aañkh khulī to dar pe khaḌī thī sub.h bhī kuchh kum.hlā.ī sī din-bhar piiTh pe Dhoyā sūraj chehre par thī gard jamī saath meñ daftar se ghar lauTī shaam bhī kuchh uktā.ī sī andeshoñ kī unglī thāme saal guzarte rahte haiñ kabhī kabhī lagne lagtī hai apnī umr parā.ī sī lauT ke jaanā nā-mumkin hai aage manzar dhuñdle haiñ baḌhte qadmoñ meñ haa.il hai ḳhauf kī gahrī khaa.ī sī sūkhe sūkhe jamunā taT par piilā piilā tāj-mahal sub.h-e-banaras dhuñdlī dhuñdlī gangā jī gadlā.ī sī"