mo'tabar se rishton kaa saaebaan rahne do — Azra Naqvi

"ik muddat ke baa'd mili ehsaas jagaati tanhaai khaamoshi se dhire dhire ghar mahkaati tanhaai aavaazon ki bhiiD mein jab bhi mujh ko pareshaan dekhaa hai haath pakaD kar le aai hai kuchh samjhaati tanhaai aankhon se jab niind bhaTak kar sahraa sahraa ghumti hai mere sirhaane raat gae tak lori gaati tanhaai bachpan mein jab garm do-pahri nange paanv phirti thi aam ke baaghon mein milti thi ras barsaati tanhaai pyaar ki khvaab-ruton mein kaisi jaagi soi rahti thi chaand hinDole mein jhuli thi jab madh-maati tanhaai pahron ham ne baatein ki hain pahron khvaab sajaae hain main roi to mujh se chhup kar ashk bahaati tanhaai bahut dinon ke baa'd sanvar kar apnaa chehra dekhaa thaa aaine se jhaank rahi thi aankh churaati tanhaai"

"kabhi ik nayaa aasmaan DhunDhti huun kabhi koi jaa-e-amaan DhunDhti huun vo ik khvaab jo main ne dekhaa nahin thaa ab us khvaab ki dhajjiyaan DhunDhti huun mujhe meri hasti se aazaad kar de vo ik lamha-e-jaavedaan DhunDhti huun adaakaar chehron ki gahraaiyon mein kahin sach ki parchhaaiyaan DhunDhti huun jo patthar se alfaaz mein jaan Daale vo andaaz-e-sehrul-bayaan DhunDhti huun nahin koi divaar-e-girya mayassar koi meherbaan raaz-daan DhunDhti huun"

"har raat sitaaron kaa safar mere liye hai har roz nai taaza sahar mere liye hai ik shahr-e-tilismaat mujhe DhunD rahaa hai bechain koi raahguzar mere liye hai jab chaahun takhayyul se kisi daur mein ji luun lamhon mein ye sadiyon kaa safar mere liye hai kahte hain samundar mein kai raaz chhupe hain sandes liye koi bhanvar mere liye hai guzre hue fankaaron ki miraas mili hai un sab ki riyaazat kaa samar mere liye hai shikve to bahut tujh se hain ai jaan magar tu chhitnaar mohabbat kaa shajar mere liye hai"

"kis ki parchhaain mire saath safar karti hai kaun hai ye jo miri umr basar karti hai khvaab ke shahr banaati hai miri ik hamraaz aur phir khud hi mujhe shahr-badar karti hai koi aavaaz kahin DhunDhti phirti hai mujhe intizaar arse se ik raahguzar karti hai isi ummid pe likhti huun hadis-e-dil-e-zaar dil se nikli hui har baat asar karti hai lafz-o-maani ke samundar mein koi saaat-e-nur kisi takhliq ke lamhe ko guhar karti hai"

"aadhi jaagi aadhi soi raat bhi thi gahnaai si aankh khuli to dar pe khaDi thi subh bhi kuchh kumhlaai si din-bhar piiTh pe Dhoyaa suraj chehre par thi gard jami saath mein daftar se ghar lauTi shaam bhi kuchh uktaai si andeshon ki ungli thaame saal guzarte rahte hain kabhi kabhi lagne lagti hai apni umr paraai si lauT ke jaanaa naa-mumkin hai aage manzar dhundle hain baDhte qadmon mein haail hai khauf ki gahri khaai si sukhe sukhe jamunaa taT par piilaa piilaa taaj-mahal subh-e-banaras dhundli dhundli gangaa ji gadlaai si"

"airport station saDkon par hain kitne saare log jaane kaun se sukh ki khaatir phirte maare maare log shaam gae ye manzar ham ne mulkon mulkon dekhaa hai ghar lauTein bojhal qadmon se bujhe hue angaare log sab se shaaki khud se naalaan apni aag mein jalte hain dukh ke sivaa aur kyaa baanTeinge in jaise andhiyaare log pur-nam aankhon bojhal dil se kitni baar vidaai li kitnaa bojh liye phirte hain ham jaise banjaare log vo kitne khush-qismat the jo apne gharon ko lauT gae shahron shahron ghuum rahe hain ham haalaat ke maare log raat gae yaadon ke jangal mein divaali hoti hai diip sajaae aa jaate hain bhule bisre pyaare log bachpan kitnaa pyaaraa thaa jab dil ko yaqin aa jaataa thaa marte hain to ban jaate hain aasmaan ke taare log"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"