Shayari Of Ejaz Ansari

sar uThāte haiñ yahāñ bhī asr-e-hāzir ke yazīd
kal ye ḳhitta bhī mahāz-e-karbalā ho jā.egā

tamām shahr se maiñ jañg jiit saktā huuñ
magar maiñ tum se bichhaḌte hī haar jā.ūñgā

"ajab hī kyā hai agar dhuñd meñ ġhubār meñ hai vo shaḳhs apne banā.e hue hisār meñ hai kahāñ hai vaqt abhī ham ko dil lagāne kā hamārī soch abhī fikr-e-rozgār meñ hai ġhamoñ ke saa.e meñ ḳhushiyoñ ke phuul mahke haiñ ḳhizāñ kā aks bhī kuchh mausam-e-bahār meñ hai jo eqtidār ke laa.eq na thā kisī sūrat sitam ye hai ki vahī shaḳhs eqtidār meñ hai ḳhudā ko karnā hai vāpas rahe ḳhayāl 'ejāz' hamāre paas to ye zindagī udhār meñ hai"

"ġham-e-hayāt kā manzar badalne vaalā hai ḳhushī manāo ki sūraj nikalne vaalā hai vo shaḳhs jis ne hamesha ḳhulūs bāñTā thā zarā sī baat pe tevar badalne vaalā hai ġhurūr hone lagā us ko apnī shohrat par ye azhdahā ise zinda nigalne vaalā hai sambhālo apne safīne ḳhud apne hāthoñ meñ sunā hai aaj samundar machalne vaalā hai vaqār-e-ilm-o-hunar kam na ho kahīñ 'ejāz' yahī charāġh havāoñ meñ jalne vaalā hai"

"apne muhāfizoñ se hirāsāñ hai zindagī is zindagī ke haal pe hairāñ hai zindagī yuuñ rūnumā hue mire hālāt meñ tazād gulshan kabhī thī aaj bayābāñ hai zindagī us shaḳhs kā bhī aaj muqaddar sañvar gayā likkhā thā jis ke dar pe pareshāñ hai zindagī ghar baiThne se mil na sakegā koī surāġh 'azm-o-'amal kī raah meñ pinhāñ hai zindagī kyoñ zindagī kī mujh ko duā de rahe haiñ aap mere liye to maut kā sāmāñ hai zindagī do-chār din meñ ġham se milegī hameñ najāt do-chār din kī aur ye mehmāñ hai zindagī 'e'jāz' koī pūchhne vaalā nahīñ yahāñ urdu kī tarah be-sar-o-sāmāñ hai zindagī"

"zindagī ik sazā lage hai mujhe jab se tū bevafā lage hai mujhe tujh meñ ḳhud ko talāsh kartā huuñ tū mirā ā.īna lage hai mujhe nāseh-e-kam-nigāh kā kirdār ishq meñ ab burā lage hai mujhe apnī āvāz se bhī Dartā huuñ sāz-e-dil bhī sazā lage hai mujhe intihā hai ye bad-nasībī kī har duā bad-duā lage hai mujhe āshiqī jurm to nahīñ 'ejāz' kis liye phir ḳhatā lage hai mujhe"

"haath meñ apne hifāzat kā asā le jaanā ghar se jaanā to buzurgoñ kī duā le jaanā baat jab tark-e-ta.alluq hī pe aa pahuñchī hai apne ḳhat bhī mire kamre se uThā le jaanā jeb ḳhālī hai magar dil meñ baḌī vus.at hai tum mire gaañv ke logoñ se vafā le jaanā tere hāthoñ meñ hai patvār mirī kashtī kī tū jidhar chāhe usī samt bahā le jaanā mujh se milne ke liye vo bhī taḌaptā hogā mere ḳhvābo mujhe hāthoñ pe uThā le jaanā pagḌiyāñ roz uchhaltī hoñ jahāñ par 'ejāz' ham ne sīkhā vahāñ izzat ko bachā le jaanā"

"kho jā.ūñ musht-e-ḳhāk meñ aisā nahīñ huuñ maiñ dariyā huuñ apnī zaat meñ qatra nahīñ huuñ maiñ guzrūñgā jis jagah se nishāñ chhoḌ jā.ūñgā āñdhī huuñ apne vaqt kī jhoñkā nahīñ huuñ maiñ manzil se ye kaho ki kare merā intizār Thahrā huā zarūr huuñ bhaTkā nahīñ huuñ maiñ pūchhī hai ḳhat meñ aap ne jo ḳhairiyat mirī kaise likhūñ janāb ki achchhā nahīñ huuñ maiñ ḳhushbū tire badan kī mire saath saath hai kah de koī havāoñ se tanhā nahīñ huuñ maiñ husn-o-shabāb sāġhar-o-mīnā the sāmne lekin kisī bhī shab kahīñ Thahrā nahīñ huuñ maiñ de kar khilaune mujh ko jo bahlā rahe haiñ log 'ejāz' un se kah do ki bachcha nahīñ huuñ maiñ"

"bichhaḌ ke tujh se mujhe dukh to hai malāl to hai magar ye pyaar nibhānā bhī ik kamāl to hai karam sahī na sahī ab tire sitam hī sahī yahī bahut hai ki tujh ko mirā ḳhayāl to hai maiñ is ḳhayāl se shohrat se duur rahtā huuñ uruuj kitnā bhī ho ek din zavāl to hai maiñ bujh gayā huuñ zamāne kī āñdhiy.oñ se magar mirā vajūd sulagtā huā savāl to hai na chaah kar bhī mirā zikr karte rahte haiñ muḳhālifoñ meñ ye ḳhūbī to hai kamāl to hai maiñ mutma.in huuñ buzurgoñ se rābta rakh kar juḌā huā mire maazī se merā haal to hai za.iif baap kā saaya bhī kam nahīñ 'ejāz' mahāz-e-zīst meñ ye naam ek Dhaal to hai"

"ye terī yaad hai terā ḳhayāl hai kyā hai añdherī raat hai phir bhī bahut ujālā hai vafā fareb hai 'ejāz' ishq dhokā hai binā ġharaz ke yahāñ kaun kis se miltā hai ġhamoñ ne chehrā kuchh itnā bigāḌ rakkhā hai ki aa.ina ho muqābil to ḳhauf aatā hai badan hai shāḳh kī mānind gul sā chehra hai hamārī jāgtī āñkhoñ ne kis ko dekhā hai ġharaz-parast mohabbat kī baat karne lage na jaane aaj kā sūraj kidhar se niklā hai kabhī sitam bhī tirā pur-kashish nazar aayā kabhī karam bhī tirā nāgavār guzrā hai kitāb-e-dil pe zarā ġhaur se nazar Daalo varaq varaq pe tumhārā hī naam likkhā hai ye kis kī laash paḌī hai saḌak pe lā-vāris ye kis kā naam likhā hai ye kis kā basta hai hai nok-e-neza pe bhī fat.h kī adā 'ejāz' hamārā sar abhī qātil ke sar se ūñchā hai"

"kyā ḳhabar thī ek din ye hādisa ho jā.egā umr bhar chāhā jise vo bevafā ho jā.egā ho agar azm-e-musammam ḳhvāhish-e-manzil ke saath raah kā patthar bhī ik din rahnumā ho jā.egā is qadar baḌhne lagī hai har taraf ālūdgī saañs lenā aadmī kā mas.ala ho jā.egā zindagī bhar saath chalne kī jo khātā hai qasam dekhnā vo rāste hī meñ judā ho jā.egā ab tumhārā koī ḳhat koī ḳhabar miltī nahīñ aise aalam meñ to jiinā bhī sazā ho jā.egā sar uThāte haiñ yahāñ bhī asr-e-hāzir ke yazīd kal ye ḳhitta bhī mahāz-e-karbalā ho jā.egā kuchh na kuchh 'ejāz' naġhme likh vatan ke naam par is tarah se shā.irī kā haq adā ho jā.egā"

"rāsta be-zabāñ be-sadā bhī nahīñ koī muḌ kar magar dekhtā bhī nahīñ mere lahje se nā-āshnā bhī nahīñ koī darvāza lekin khulā bhī nahīñ 'umr-bhar ham bhaTakte rahe dar-ba-dar koī manzil koī rāsta bhī nahīñ sar jhukā kar mile dostoñ se magar qad hamārā kisī se ghaTā bhī nahīñ ḳhud kī nazroñ meñ gir kar pata ye chalā is se baḌh kar to koī sazā bhī nahīñ ai falak tū hamārā nigahbān hai in fasādoñ meñ ab kuchh bachā bhī nahīñ inkisārī se milte haiñ 'e'jāz' ham varna ham se to koī baḌā bhī nahīñ"