Wamiq Jaunpuri

rahna tum chahe jahan khabron men aate rahna
ham ko ehsas-e-juda.i se bachate rahna

use zid ki 'vamiq'-e-shikva-gar kisi raaz se na ho ba-khabar
mujhe naaz hai ki ye dida-var miri umr bhar ki talash hai

ai kaash mire gosh o nazar bhi rahen sabit
jab husn suna jaa.e ya naghma nazar aa.e

ham ko hajat nahin naqibon ki
sher apna naqib hai khud hi

na puchho bebasi us tishna-lab ki
ki jis ki dastaras men jaam bhi hai

sarkashi khud-kashi pe khatm hui
ek rassi thi jal ga.i shayad

kaun suntaa hai bhikaari ki sadaaein is liye
kuchh zarifaana latife yaad kar lete hain ham

pahchaan lo us ko vahi qaatil hai hamaaraa
jis haath mein TuuTi hui talvaar lage hai

mire fikr o fan ko nai fazaa nae baal-o-par ki talaash hai
jo qafas ko yaas ke phunk de mujhe us sharar ki talaash hai

vo vaade yaad nahin tishna hai magar ab tak
vo vaade bhi koi vaade jo mai pilaa ke liye

kis ne basaayaa thaa aur un ko kis ne yuun barbaad kiyaa
apne lahu ki bu aati hai in ujDe baazaaron se

ye maanaa shisha-e-dil raunaq-e-baazaar-e-ulfat hai
magar jab TuuT jaataa hai to qimat aur hoti hai