Ghazal

mohabbat ki intihaa chaahtaa huun

unhein haasil-e-ibtidaa chaahtaa huun

use barmalaa dekhnaa chaahtaa huun

adab ai mohabbat ye kyaa chaahtaa huun

· · ·

hayaat-o-maut kaa ik silsilaa hai

mohabbat intihaa tak ibtidaa hai

main kyaa jaanun ki baab-e-tauba kyaa hai

abhi to mai-kade kaa dar khulaa hai

· · ·

pi rahaa huun ki haqiqat ye faraamosh nahin

ahl-e-dil ke liye ik haadisa hai hosh nahin

nigah-o-dil se mire bach ke samaa jaa mujh mein

main khud aaghosh huun meraa koi aaghosh nahin

· · ·

muddaaa koi apnaa na paayaa

jab duaa ke liye haath uThaayaa

us mein apnaa hi sab aks paayaa

un ke chehre pe jo rang aaya

· · ·

nahin ye jalva-haa-e-raaz-e-irfaan dekhne vaale

tumhein kab dekhte hain kufr-o-imaan dekhne vaale

khudaa rakkhe tire gham kaa bahut naazuk zamaana hai

sahar dekhein na dekhein shaam-e-hijraan dekhne vaale

· · ·

na furqat ne luuTaa na aahon ne maaraa

mohabbat bhare ishtibaahon ne maaraa

mire dil ko un ki nigaahon ne maaraa

inhin do mohabbat-panaahon ne maaraa

· · ·

har taraf soz kaa andaaz judaagaana hai

mutmain shama hai yaa raqs mein parvaana hai

bartar-az-vahm-o-tasavvur miraa mai-khaana hai

zindagi kyaa hai miri laghzish-e-mastaana hai

· · ·

zabt-e-gham kar bhi liyaa to kyaa kiyaa

dil ki rag rag se lahu Tapkaa kiyaa

har tajalli aap ki tasviri thi

is liye main har taraf dekhaa kiyaa

· · ·

shauq ko be-adab kiyaa ishq ko hausla diyaa

uzr-e-nigaah-e-dost ne jurm-e-nazar sikhaa diyaa

aah vo bad-nasib aah naala-e-andalib-e-aah

meraa fasaana-e-alam jaise mujhe sunaa diyaa

· · ·

vaaraftagi-e-ishq na jaae to kyaa karein

teraa bhi ab khayaal na aae to kyaa karein

khud sharm-e-ishq dil ko miTaae to kyaa karein

un tak nigaah-e-shauq na jaae to kyaa karein

· · ·

ishq-e-sitam-parast kyaa husn-e-sitam-shi'aar kyaa

ham bhi unhin ke hain to phir apnaa bhi e'tibaar kyaa

ishrat-e-zist ki qasam ishrat-e-mustaaar kyaa

gham bhi jo mustaqil na ho gham kaa bhi e'tibaar kyaa

· · ·

ab na taDpaae fareb-e-gham-e-hijraan mujh ko

nazar aate hain vo rag rag mein khiraamaan mujh ko

jaan kar us ne charaagh-e-shab-e-hijraan mujh ko

kar diyaa subh-e-azal hi se farozaan mujh ko

· · ·

divaana apnaa kaun saa aalam dikhaa gayaa

un ke labon pe ek tabassum saa aa gayaa

muddat se zindagi mein nahin koi inqalaab

shaayad tiraa firaaq mujhe raas aa gayaa

· · ·

miri iltijaa se khafaa na ho ki vo josh-e-dil thaa gila na thaa

kabhi ranj main ne sahaa na thaa kabhi dil kisi ko diyaa na thaa

mire haathon mujh ko alam mile ye main kyon kahun ki khudaa na thaa

miraa kaaba thaa haram-e-butaan miraa qibla qibla-numaa na thaa

· · ·

miT gae ham muddaaa-e-ishq haasil ho gayaa

ye fasaana apni be-rabti se kaamil ho gayaa

un kaa barbaad-e-karam kahne ke qaabil ho gayaa

dil haqiqat mein jahaan TuuTaa vahin dil ho gayaa

· · ·

sab kaaenaat-e-husn kaa haasil liye hue

baiThaa huun dil mein ishq ki mahfil liye hue

ik ik nazar farebi-e-saahil liye hue

har mauj saamne hai miraa dil liye hue

· · ·

abhi yaa-rab bahut kuchh vusatein hain mere daamaan mein

chaman kaa kaanTaa kaanTaa khinch ke aa jaae bayaabaan mein

mire mazhab pe rashk-afroziyaan hain kufr-o-imaan mein

ilaahi kyaa kashish rakh di jabin-e-ijz-saamaan mein

· · ·

mere rone par kisi ki chashm giryaan haae haae

vo gul-e-tar vo fazaa-e-shabnamistaan haae haae

vo kisi ki yaad-e-paiham shaam-e-hijraan haae haae

har nafas vaqf-e-navaa-haa-e-pareshaan haae haae

· · ·

kuchh sila hi na milaa ishq mein jal jaane kaa

shama ne luuT liyaa soz bhi parvaane kaa

zabt-e-fariyaad ki be-sud tavaqqo dil se

zarf kyuun dekhiye TuuTe hue paimaane kaa

· · ·

jaise bhi ye duniyaa hai jo kuchh bhi zamaanaa hai

sab teri kahaani hai sab meraa fasaanaa hai

ik barq-e-siyah-masti ik shoala-e-mad-hoshi

miinaa se giraanaa hai saaghar se uThaanaa hai

· · ·

koi meayaar-e-mohabbat na rahaa mere baad

har taraf aam hain khaasaan-e-vafaa mere baad

silsila un ke sitam kaa na rahaa mere baad

badlaa badlaa saa hai dastur-e-jafaa mere baad

· · ·

ek markaz pe miraa zauq-e-tamaashaa na rahaa

abhi parda na rahaa thaa abhi jalva na rahaa

jo dikhaae miri ghaflat ne dikhaae manzar

jab khuli aankh to phir koi tamaashaa na rahaa

· · ·

un kaa barbaad-e-karam kahne ke qaabil ho gayaa

dard pahlu mein jahaan bhi thaa vahin dil ho gayaa

baarhaa dekhaa hai dil ne o mire mahv-e-khiraam

hashr uTThaa aur tire qadmon mein shaamil ho gayaa

· · ·

kisi ke naqsh-e-qadam kaa nishaan nahin miltaa

vo rahguzar huun jise kaarvaan nahin miltaa

qadam qadam pe tiri raah mein falak haail

mujhe talaash se bhi aasmaan nahin miltaa

· · ·