Siraj Aurangabadi

kaan meñ hai tere motī āb-dār
yā kisī āshiq kā aañsū bolnā

chalī samt-e-ġhaib siiñ kyā havā ki chaman zuhūr kā jal gayā
magar ek shāḳh-e-nihāl-e-ġham jise dil kaho so harī rahī

hamārī baat mohabbat siiñ tum jo gosh karo
to apnī prem kahānī tumheñ sunā.ūñgā

na būjho āsmāñ par tum sitāre
hamārī aah kī chingāriyāñ haiñ

takiya-e-maḳhmalī sirhāne rakh
lekin āñkhoñ siiñ apnī ḳhvāb nikāl

vo āshiqī ke khet meñ sābit qadam huā
jo koī zaḳhm-e-ishq liyā dil kī Dhaal par

maktab-e-ishq kā moallim huuñ
kyuuñ na ho.e dars-e-yār kī takrār

junūñ ke shahr meñ niiñ kam-ayār kuuñ hurmat
maiñ naqd-e-qalb kuuñ kāñTe meñ dil ke tol chukā

aa shitābī siiñ vagarna majlis-e-ushshāq meñ
zulm hai ġham hai qayāmat hai ḳharābī ai sanam

tirī abrū hai mehrāb-e-mohabbat
namāz-e-ishq mere par huī farz

shah-e-be-ḳhudī ne atā kiyā mujhe ab libās-e-barahnagī
na ḳhirad kī baḳhiya-garī rahī na junūñ kī parda-darī rahī

roza-dārān-e-judā.ī kuuñ ḳham-e-abrū-e-yār
māh-e-īd-e-ramazāñ thā mujhe ma.alūm na thā