Parveen Shakir

vo na aa.egā hameñ ma.alūm thā is shaam bhī
intizār us kā magar kuchh soch kar karte rahe

justujū kho.e huoñ kī umr bhar karte rahe
chāñd ke hamrāh ham har shab safar karte rahe

ḳhud apne se milne kā to yaarā na thā mujh meñ
maiñ bhiiḌ meñ gum ho ga.ī tanhā.ī ke Dar se

dil ajab shahr ki jis par bhī khulā dar is kā
vo musāfir ise har samt se barbād kare

mas.ala jab bhī charāġhoñ kā uThā
faisla sirf havā kartī hai

vo to ḳhush-bū hai havāoñ meñ bikhar jā.egā
mas.ala phuul kā hai phuul kidhar jā.egā

band kar ke mirī āñkheñ vo sharārat se hañse
būjhe jaane kā maiñ har roz tamāshā dekhūñ

zindagī merī thī lekin ab to
tere kahne meñ rahā kartī hai

bārhā terā intizār kiyā
apne ḳhvāboñ meñ ik dulhan kī tarah

gavāhī kaise TūTtī muāmla ḳhudā kā thā
mirā aur us kā rābta to haath aur duā kā thā

shab vahī lekin sitāra aur hai
ab safar kā isti.āra aur hai

itne ghane bādal ke pīchhe
kitnā tanhā hogā chāñd