Ghazal

ham faqiron kaa sune gar zikr-e-arra faakhta

apni ku-ku par kare hargiz na gharra faakhta

jal ke khaakistar abhi ho jaae tu ik aan mein

gar tire dil mein ho soz-e-ishq zarra faakhta

· · ·

chashm-e-khunbaar saa barse na kabhu paani ek

abr har chand kare apnaa lahu paani ek

shust-o-shu naama-e-aamaal ki jis se hoe

baras ai abr-e-karam mujh pe vo tu paani ek

· · ·

har uzv-e-badan ek se hai ek tiraa khuub

siine ki safaai se hai chehre ki safaa khuub

qaasid ke badan par alif-e-zakhm lage hain

khat kaa mire likkhaa ye javaab aap ne kyaa khuub

· · ·

ye kaun saa parvaana muaa jal ke lagan mein

hairat se jo hai shama ki angusht dahan mein

kahte hain use chaah-e-zanakhdaan ghalati se

bose kaa nishaan hai ye tire seb-e-zaqan mein

· · ·

shaana to chhuTaa zulf-e-pareshaan se ulajh kar

suljhaa na ye dil kaakul-e-pechaan se ulajh kar

letaa hai khabar kaun asiraan-e-balaa ki

mar mar gae taariki-e-zindaan se ulajh kar

· · ·

tegh-e-pur-khun vo agar dhoe kanaar-e-dariyaa

khanda-zan rang-e-chaman par ho bahaar-e-dariyaa

atash-e-ishq ki lazzat ye mili hai ham ko

jaa girein aag mein aur hon na dochaar-e-dariyaa

· · ·

kyunkar ye tuf-e-ashk se mizhgaan mein lagi aag

shabnam se kahin bhi hai niyastaan mein lagi aag

na us se dhuaan nikle hai na shoala uThe hai

ye turfa hamaare dil-e-naalaan mein lagi aag

· · ·

gil hai aariz to qadd-e-yaar darakht

kab ho aisaa bahaar-daar darakht

rashk se ik nihaal qad ke tire

kaT gae jal gae hazaar darakht

· · ·

hai kaun shai jis ki zid nahin hai jahaan khushi hai malaal bhi hai

gham-e-judaai na khaa tu ai dil firaaq hai to visaal bhi hai

jo Tiika sandal kaa hai jabin par to paas abru ki khaal bhi hai

siphar-e-khubi ye maah bhi hai sabil bhi hai hilaal bhi hai

· · ·

kis tarah naala kare bulbul chaman ki yaad mein

ghis gai us ki zabaan to shikva-e-sayyaad mein

daad-khvaahon ki agar pursish hui roz-e-jazaa

sab se pahle aaeinge ham arsa-e-faryaad mein

· · ·

kisi ke main libaas-e-aariyat ko kyaa samajhtaa huun

phaTe kapDon ko apni khilat-e-dibaa samajhtaa huun

jahaan divaana koi apne saae se ulajhtaa hai

use zulf-e-musalsal kaa tiri saudaa samajhtaa huun

· · ·

nigaah-e-yaar ham se aaj be-taqsir phirti hai

kisi ki kuchh nahin chalti hai jab taqdir phirti hai

muraqqaa hai miri aankhon mein kyaa yaaraan-e-rafta kaa

jo nazron ke tale har ek ki tasvir phirti hai

· · ·

vo meraa dard-e-dil kyaa jaante hain

taDapne ko tamaashaa jaante hain

bahaar-e-gul hai khaar aankhon mein tujh bin

chaman ko ham to sahraa jaante hain

· · ·

har koi us kaa kharidaar huaa chaahtaa hai

garm phir husn kaa baazaar huaa chaahtaa hai

dekh lenaa gham-e-maashuq mein kuDhte kuDhte

kuchh na kuchh ab mujhe aazaar huaa chaahtaa hai

· · ·

marte dam o bevafaa dekhaa tujhe

ik nazar dekhaa to kyaa dekhaa tujhe

ai pari-ru kyuun na main divaana huun

baal khole baarhaa dekhaa tujhe

· · ·

na puchh hijr mein jo kuchh huaa hamaaraa haal

jise na ishq ho vo jaane kyaa hamaaraa haal

yaqin hai ki kaheinge vo ham-safiron se

qafas mein dekh gai hai sabaa hamaaraa haal

· · ·

aa ke sajjaada-nashin qais huaa mere baad

na rahi dasht mein khaali koi jaa mere baad

miyaan mein us ne jo ki tegh-e-jafaa mere baad

khun-girafta koi kyaa aur na thaa mere baad

· · ·