kis ko dekhaa un ki surat dekh kar — Aasi Ghazipuri

itnaa to jaante hain ki aashiq fanaa huaa
aur us se aage baDh ke khudaa jaane kyaa huaa

vo yahaan tak jo aa nahin sakte
kyaa mujhe bhi bulaa nahin sakte

lab-e-naazuk ke bose luun to missi munh banaati hai
kaf-e-paa ko agar chumun to mehndi rang laati hai

bimaar-e-gham ki chaaragari kuchh zarur hai
vo dard dil mein de ki masihaa kahein jise

in aankhon ko jab se basaarat mili hai
sivaa tere kuchh main ne dekhaa nahin hai

subh tak vo bhi na chhoDi tu ne ai baad-e-sabaa
yaadgaar-e-raunaq-e-mahfil thi parvaane ki khaak