subh tak vo bhi na chhoDi tu ne ai baad-e-sabaa — Aasi Ghazipuri

itnaa to jaante hain ki aashiq fanaa huaa
aur us se aage baDh ke khudaa jaane kyaa huaa

vo yahaan tak jo aa nahin sakte
kyaa mujhe bhi bulaa nahin sakte

lab-e-naazuk ke bose luun to missi munh banaati hai
kaf-e-paa ko agar chumun to mehndi rang laati hai

bimaar-e-gham ki chaaragari kuchh zarur hai
vo dard dil mein de ki masihaa kahein jise

in aankhon ko jab se basaarat mili hai
sivaa tere kuchh main ne dekhaa nahin hai

kis ko dekhaa un ki surat dekh kar
ji mein aataa hai ki sajda kijiye

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

ab aap aa gae hain to aataa nahin hai yaad
varna hamein kuchh aap se kahnaa zarur thaa

ashkon mein piro ke us ki yaadein
paani pe kitaab likh rahaa huun

tu mujh se mere zamaanon kaa puchhti hai to sun!
tiraa junun, tiraa saudaa, tiri talab, tiri yaad

kaise kisi ki yaad hamein zinda rakhti hai
ek khayaal sahaaraa kaise ho saktaa hai