baghair-e-jism bhi hai jism kaa ehsaas zinda — Ahmad Shanas

bahut chhoTaa safar thaa zindagi kaa
main apne ghar ke andar tak na pahunchaa

— Ahmad Shanas

baahar insaanon se nafrat hai lekin
ghar mein Dheron bachche paidaa karte hain

— Ahmad Shanas

kaun qatre mein uThaataa hai talaatum
aur antar-aatmaa tak sinchtaa hai

— Ahmad Shanas

chaand mein darvesh hai jugnu mein jogi
kaun hai vo aur kis ko khojtaa hai

— Ahmad Shanas

saat qulzum hain mire siine mein
ek qatre se ubhaaraa thaa mujhe

— Ahmad Shanas

main us ki pahchaan huun yaa vo meri
kyaa samjhun aur vo samjhaae kyaa kyaa

— Ahmad Shanas

jhaankte raat ke garebaan se
ham ne sau aaftaab dekhe hain

— Salman Akhtar

shor din ko nahin sone detaa
shab ko sannaaTaa jagaa detaa hai

— Saifuddin Saif

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shikva-e-zulmat-e-shab se to kahin behtar thaa
apne hisse ki koi shama jalaate jaate

— Ahmad Faraz

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

— Zafar Iqbal

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat