jhaankte raat ke garebaan se — Salman Akhtar

kuchh to apne liye bhi rakhnaa hai
zakhm auron ko kyuun dikhaaein sab

ham jo pahle kahin mile hote
aur hi apne silsile hote

zindagi is qadar kaThin kyuun hai
aadmi ki bhalaa khataa kyaa hai

ye alag baat ki vo mujh se khafaa rahtaa hai
main ik insaan huun aur mujh mein khudaa rahtaa hai

ik vahi shakhs mujh ko yaad rahaa
jis ko samjhaa thaa bhuul jaaungaa

kaise ho kyaa hai haal mat puchho
mujh se mushkil savaal mat puchho

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

palkon pe gham-e-hijr ke sab diip jalaae
nindon ke shabistaan mein bhaari miri aankhein

sakht vahshat si barasti hai shab-o-roz yahaan
ab to ghaughaa-e-sagaan tak mein asar koi nahin

tu bhi to haTaa jism ke suraj se andhere
ye mahki hui raat bhi mahtaab-ba-kaf hai