us shajar ke saae mein baiThaa huun main — Ali Ahmad Jalili

ham ne dekhaa hai zamaane kaa badalnaa lekin
un ke badle hue tevar nahin dekhe jaate

laai hai kis maqaam pe ye zindagi mujhe
mahsus ho rahi hai khud apni kami mujhe

nasheman hi ke luT jaane kaa gham hotaa to kyaa gham thaa
yahaan to bechne vaale ne gulshan bech Daalaa hai

roke se kahin haadsa-e-vaqt rukaa hai
shoalon se bachaa shahr to shabnam se jalaa hai

kyaa isi vaaste sinchaa thaa lahu se apne
jab sanvar jaae chaman aag lagaa di jaae

gham se mansub karun dard kaa rishta de duun
zindagi aa tujhe jiine kaa saliqa de duun