roke se kahin haadsa-e-vaqt rukaa hai — Ali Ahmad Jalili

ham ne dekhaa hai zamaane kaa badalnaa lekin
un ke badle hue tevar nahin dekhe jaate

laai hai kis maqaam pe ye zindagi mujhe
mahsus ho rahi hai khud apni kami mujhe

nasheman hi ke luT jaane kaa gham hotaa to kyaa gham thaa
yahaan to bechne vaale ne gulshan bech Daalaa hai

kyaa isi vaaste sinchaa thaa lahu se apne
jab sanvar jaae chaman aag lagaa di jaae

us shajar ke saae mein baiThaa huun main
jis ki shaakhon par koi pattaa nahin

gham se mansub karun dard kaa rishta de duun
zindagi aa tujhe jiine kaa saliqa de duun

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

gulshan ke kaarobaar mein bikti hai rangat is tarah
kis phuul mein khushbu hai kitni dekhtaa koi nahin

rafta rafta log 'aadi ho gae
raat ko din ki tarah bartaa gayaa