Zindagi

ab to ye aarzū hai ki vo zaḳhm khā.iye
tā-zindagī ye dil na koī aarzū kare

jo zahr pī chukā huuñ tumhīñ ne mujhe diyā
ab tum to zindagī kī duā.eñ mujhe na do

go safedī mū kī yuuñ raushan hai juuñ āb-e-hayāt
lekin apnī to isī zulmāt se thī zindagī

rāz-e-hayāt pūchh le ḳhizr-e-ḳhajista gaam se
zinda har ek chiiz hai koshish-e-nā-tamām se

zindagānī kī haqīqat kohkan ke dil se pūchh
jū-e-shīr o tesha o sañg-e-girāñ hai zindagī

zindagī merī thī lekin ab to
tere kahne meñ rahā kartī hai

yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo

rahegā saath tirā pyaar zindagī ban kar
ye aur baat mirī zindagī vafā na kare

maanā jīvan meñ aurat ik baar mohabbat kartī hai
lekin mujh ko ye to batā de kyā tū aurat zaat nahīñ

jannat kī zindagī hai jis kī fazā meñ jiinā
merā vatan vahī hai merā vatan vahī hai

hosh vāloñ ko ḳhabar kyā be-ḳhudī kyā chiiz hai
ishq kiije phir samajhiye zindagī kyā chiiz hai

muflisoñ kī zindagī kā zikr kyā
muflisī kī maut bhī achchhī nahīñ

phir usī bevafā pe marte haiñ
phir vahī zindagī hamārī hai

is zindagī meñ itnī farāġhat kise nasīb
itnā na yaad aa ki tujhe bhuul jaa.eñ ham

zindagī phailī huī thī shām-e-hijrāñ kī tarah
kis ko itnā hausla thā kaun jī kar dekhtā

zindagī terī atā thī so tire naam kī hai
ham ne jaise bhī basar kī tirā ehsāñ jānāñ

ik dam kī zindagī ke liye mat uThā mujhe
ai be-ḳhabar maiñ naqsh-e-zamīñ kī nishast huuñ

silvaTeñ haiñ mire chehre pe to hairat kyuuñ hai
zindagī ne mujhe kuchh tum se ziyāda pahnā

zindagī se yahī gila hai mujhe
tū bahut der se milā hai mujhe

yahīñ tak laa.ī hai ye zindagī bhar kī masāfat
lab-e-dariyā huuñ maiñ aur vo pas-e-dariyā khilā hai