miri majburiyon ne naazuki kaa khuun kar Daalaa — Ameerul Islam Hashmi

bahut mushkil thaa jin ko DhunDnaa make-up ke malbe se
so andaaze se un kaa baankpan likhnaa paDaa mujh ko

— Ameerul Islam Hashmi

chhoDaa hai jab se parda mardaa gai hai aurat
radd-o-badal hai kyaa kyaa ye arz phir karungaa

— Ameerul Islam Hashmi

zulekhaaein ba-zid thiin ek yusuf ke liye yaaro
baDi hi garmi-e-baazaar thi kal shab jahaan main thaa

— Ameerul Islam Hashmi

pata mushkil se chaltaa hai muzakkar aur muannas kaa
kabhi maalum hotaa hai kabhi maalum hoti hai

— Ameerul Islam Hashmi

hamaari umr ab aisi hai ham siiTi nahin sunte
rukaa karte the khush ho kar kabhi siiTi bajaane par

— Ameerul Islam Hashmi

jinhein saaDi mein aanaa thaa vo patlunon mein aaiin thiin
tamiz-e-mard-o-zan dushvaar thi kal shab jahaan main thaa

— Ameerul Islam Hashmi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

main us gulshan kaa bulbul huun bahaar aane nahin paati
ki sayyaad aan kar meraa gulistaan mol lete hain

— Haidar Ali Aatish