shaahraahein dafatan shoale ugalne lag gaiin — Aabid Adeeb

jinhein ye fikr nahin sar rahe rahe na rahe
vo sach hi kahte hain jab bolne pe aate hain

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

safar mein aise kai marhale bhi aate hain
har ek moD pe kuchh log chhuT jaate hain

jahaan pahunch ke qadam Dagmagaae hain sab ke
usi maqaam se ab apnaa raastaa hogaa

amir-e-kaarvaan hai tang ham se
hamaaraa raastaa sab se alag hai

ham se 'aabid' apne rahbar ko shikaayat ye rahi
aankh munde un ke pichhe chalne vaale ham nahin

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

ret par ik nishaan hai shaayad
ye hamaaraa makaan hai shaayad

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi