kisi ke lahje ki yakh-bastagi qayaamat thi — Arshi Malik

sab ke sab mil kar bhi mujh ko zer kar sakte na the
meraa apnaa haath shaamil hai miri paspaai mein

— Arshi Malik

tu chhuDaa kar haath ik din daf'atan kho jaaegaa
aur meri jeb mein teraa pata rah jaaegaa

— Arshi Malik

kuud kar divaar 'arshi' gham gharon mein aa base
anginat taa'viz darvaazon pe laTke rah gae

— Arshi Malik

ik 'umr se ulfat ke kaTahre mein khaDaa hai
bhugtaae hain is dil ne muqadmaat musalsal

— Arshi Malik

ik lafz bhi na lab se kahaa aur ro diye
'arshi' uThaae dast-e-du'aa aur ro diye

— Arshi Malik

lab-e-khaamosh mein hi jaa-e-amaan aaj bhi hai
varna kahne ko to har munh mein zabaan aaj bhi hai

— Arshi Malik