lab-e-khaamosh mein hi jaa-e-amaan aaj bhi hai — Arshi Malik

sab ke sab mil kar bhi mujh ko zer kar sakte na the
meraa apnaa haath shaamil hai miri paspaai mein

tu chhuDaa kar haath ik din daf'atan kho jaaegaa
aur meri jeb mein teraa pata rah jaaegaa

kuud kar divaar 'arshi' gham gharon mein aa base
anginat taa'viz darvaazon pe laTke rah gae

kisi ke lahje ki yakh-bastagi qayaamat thi
ThiThur ke rah gayaa lab par savaal kaa mausam

ik 'umr se ulfat ke kaTahre mein khaDaa hai
bhugtaae hain is dil ne muqadmaat musalsal

ik lafz bhi na lab se kahaa aur ro diye
'arshi' uThaae dast-e-du'aa aur ro diye

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ret par ik nishaan hai shaayad
ye hamaaraa makaan hai shaayad

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

gham hai na ab khushi hai na ummid hai na yaas
sab se najaat paae zamaane guzar gae

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai