vaqt aur haalaat par kyaa tabsira kiije ki jab — Chandrabhan Khayal

nazar mein shokh shabihein liye hue hai sahar
abhi na koi idhar se dhuaan dhuaan guzre

sochtaa huun to aur baDhti hai
zindagi hai ki pyaas hai koi

apni divaaron se kuchh baahar nikal
sirf khaali ghar ke baam-o-dar na dekh

shahr mein jurm-o-havaadis is qadar hain aaj-kal
ab to ghar mein baiTh kar bhi log ghabraane lage

kyaa usi kaa naam hai raanaai-e-bazm-e-hayaat
tang kamra sard bistar aur tanhaa aadmi

paas se dekhaa to jaanaa kis qadar maghmum hain
an-ginat chehre ki jin ko shaadmaan samjhaa thaa main