ham na kahte the hansi achchhi nahin — Imdad Ali Bahr

qaazi ko jo rind kuchh chaTaa dein
masjid ki baghal mein mai-kada ho

khush raho yaar agar ham se ho bezaar bahut
dil agar apnaa salaamat hai to dildaar bahut

mire qatl par tum ne biiDaa uThaayaa
mire haath kaa paan khaayaa to hotaa

mire baghair na ik-dam use qaraar aataa
zaraa bhi zabt jo mujh be-qaraar mein hotaa

na mohabbat hai dilon mein na hayaa aankhon mein
ye sanam tu ne banaae hain khudaayaa kaise

sau fasaad ek ishq mein uTThe
boyaa ik tukhm uge hazaar darakht