khush raho yaar agar ham se ho bezaar bahut — Imdad Ali Bahr

qaazi ko jo rind kuchh chaTaa dein
masjid ki baghal mein mai-kada ho

mire qatl par tum ne biiDaa uThaayaa
mire haath kaa paan khaayaa to hotaa

ham na kahte the hansi achchhi nahin
aa gai aakhir rukaavaT dekhiye

mire baghair na ik-dam use qaraar aataa
zaraa bhi zabt jo mujh be-qaraar mein hotaa

na mohabbat hai dilon mein na hayaa aankhon mein
ye sanam tu ne banaae hain khudaayaa kaise

sau fasaad ek ishq mein uTThe
boyaa ik tukhm uge hazaar darakht

jab ki pahlu se yaar uThtaa hai
dard be-ikhtiyaar uThtaa hai

pyaar ki baatein kijiye saahab
lutf sohbat kaa guftugu se hai

kyunkar baDhaaun rabt na darbaan-e-yaar se
aakhir koi to milne ki tadbir chaahiye

hamaare marg pe shaadi abas aghyaar karte hain
jahaan se rafta-rafta ek din un ko bhi jaanaa hai

vaqt jab aaya to sab daave zabaani nikle
yaar samjhe the jinhein dushman-e-jaani nikle

hai dil mein zulf-e-yaar ke aalam ko dekhiye
phanste hain aap daam mein ham ham ko dekhiye