ab to aa jaao rasm-e-duniyaa ki — Javed Kamal Rampuri

haath phir baDh rahaa hai su-e-jaam
zindagi ki udaasiyon ko salaam

agar sukun se umr-e-aziz khonaa ho
kisi ki chaah mein khud ko tabaah kar liije

haae vo log ham se ruuTh gae
jin ko chaahaa thaa zindagi ki tarah

phir kai zakhm-e-dil mahak uTThe
phir kisi bevafaa ki yaad aai

vahi be-vajh udaasi vahi be-naam khalish
raah-o-rasm-e-dil-e-naakaam se ji Dartaa hai

din ke siine mein dhaDakte hue lamhon ki qasam
shab ki raftaar-e-subuk-gaam se ji Dartaa hai