darakht-e-zard mein jaise haraa saa rahtaa hai — Mahender Kumar Sani

raushni mein lafz ke tahlil ho jaane se qabl
ik khalaa paDtaa hai jis mein ghumtaa rahtaa huun main

raat din gardish mein hain lekin paDaa rahtaa huun main
kaam kyaa meraa yahaan hai sochtaa rahtaa huun main

main tanhaai ko apnaa ham-safar kyaa maan baiThaa
mujhe lagtaa hai mere saath duniyaa chal rahi hai

divaar-e-khvaab mein koi dar kar nahin sake
ham log shab se aage safar kar nahin sake

tujhe raushni se judaa karun kisi shaam main
tujhe itni taab mein dekhnaa nahin ho rahaa

main apni yaatraa par jaa rahaa huun
mujhe ab lauT kar aanaa nahin hai