Safar

kisī ko ghar se nikalte hī mil ga.ī manzil
koī hamārī tarah umr bhar safar meñ rahā

justujū kho.e huoñ kī umr bhar karte rahe
chāñd ke hamrāh ham har shab safar karte rahe

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

dil ajab shahr ki jis par bhī khulā dar is kā
vo musāfir ise har samt se barbād kare

guzar jā aql se aage ki ye nuur
charāġh-e-rāh hai manzil nahīñ hai!

zamāna aql ko samjhā huā hai mish.al-e-rāh
kise ḳhabar ki junūñ bhī hai sāhib-e-idrāk

yahāñ kisī ko koī rāsta nahīñ detā
mujhe girā ke agar tum sambhal sako to chalo

bāġh-e-bahisht se mujhe hukm-e-safar diyā thā kyuuñ
kār-e-jahāñ darāz hai ab mirā intizār kar

uqābī ruuh jab bedār hotī hai javānoñ meñ
nazar aatī hai un ko apnī manzil āsmānoñ meñ

na jaane kis liye ummīd-vār baiThā huuñ
ik aisī raah pe jo terī rahguzar bhī nahīñ

har shai musāfir har chiiz raahī
kyā chāñd taare kyā murġh o maahī

shab vahī lekin sitāra aur hai
ab safar kā isti.āra aur hai

ye kaun phir se unhīñ rāstoñ meñ chhoḌ gayā
abhī abhī to azāb-e-safar se niklā thā

tujh zulf meñ dil ne gum kiyā raah
is prem galī kuuñ intihā na.iiñ

na chhāñv karne ko hai vo āñchal na chain lene ko haiñ vo bāñheñ
musāfiroñ ke qarīb aa kar har ik baserā palaT gayā hai

apnī marzī se kahāñ apne safar ke ham haiñ
ruḳh havāoñ kā jidhar kā hai udhar ke ham haiñ

guftugū achchhī lagī zauq-e-nazar achchhā lagā
muddatoñ ke baad koī ham-safar achchhā lagā

vāmāñdgān-e-rāh to manzil pe jā paḌe
ab tū bhī ai 'nazīr' yahāñ se qadam tarāsh

'faiz' thī raah sar-ba-sar manzil
ham jahāñ pahuñche kāmyāb aa.e

be-dar-o-dīvār sā ik ghar banāyā chāhiye
koī ham-sāya na ho aur pāsbāñ koī na ho