Tanhai

ḳhud apne se milne kā to yaarā na thā mujh meñ
maiñ bhiiḌ meñ gum ho ga.ī tanhā.ī ke Dar se

ham haal to kah sakte haiñ apnā pa kaheñ kyā
jab vo idhar aate haiñ to tanhā nahīñ aate

tanhā rahne meñ bhī koī uzr nahīñ hai
lekin us ke saath hī tanhā rah saktā huuñ

ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai

añgḌā.ī par añgḌā.ī letī hai raat judā.ī kī
tum kyā samjho tum kyā jaano baat mirī tanhā.ī kī

sāmne umr paḌī hai shab-e-tanhā.ī kī
vo mujhe chhoḌ gayā shaam se pahle pahle

us ke dushman haiñ bahut aadmī achchhā hogā
vo bhī merī hī tarah shahr meñ tanhā hogā

mujh se chhuḌvā.e mire saare usuul us ne 'zafar'
kitnā chālāk thā maarā mujhe tanhā kar ke

shab kī tanhā.ī meñ ab to akasr
guftugū tujh se rahā kartī hai

itne ghane bādal ke pīchhe
kitnā tanhā hogā chāñd

ġhalat hai aap na the ham-kalām ḳhalvat meñ
adū se aap kī tasvīr boltī hogī

achchhā hai dil ke saath rahe pāsbān-e-aql
lekin kabhī kabhī ise tanhā bhī chhoḌ de

bāhar galī meñ chalte hue log thak ga.e
tanhā.iyoñ kā shor thā ḳhālī makān meñ

ek mahfil meñ ka.ī mahfileñ hotī haiñ sharīk
jis ko bhī paas se dekhoge akelā hogā

hai aadmī bajā.e ḳhud ik mahshar-e-ḳhayāl
ham anjuman samajhte haiñ ḳhalvat hī kyuuñ na ho

har taraf har jagah be-shumār aadmī
phir bhī tanhā.iyoñ kā shikār aadmī

us kā kyā hai tum na sahī to chāhne vaale aur bahut
tark-e-mohabbat karne vaalo tum tanhā rah jāoge

akelā us ko na chhoḌā jo ghar se niklā vo
har ik bahāne se maiñ us sanam ke saath rahā

kaav kāv-e-saḳht-jānī hā.e-tanhā.ī na pūchh
sub.h karnā shaam kā laanā hai jū-e-shīr kā

lāzim thā ki dekho mirā rastā koī din aur
tanhā ga.e kyuuñ ab raho tanhā koī din aur