aaj gar bole nahin haq baat par — Mahwar Sirsivi

vo apne ‘abd-e-haqiqi ko aazmaataa hai
har ik bashar kaa yahaan imtihaan nahin hotaa

vaqt ke paanv bhi nahin mehvar
aur raftaar bhi ghazab ki hai

ghaur se dekhnaa hanste hue chehre ki taraf
ek manzar pas-e-manzar kai manzar degaa

ulfat to dekhiye miri didaar ke sabab
darvesh ban ke yaar ki chaukhaT pe aa gayaa

kuchh to khayaal kar miri umr-e-daraaz kaa
sadiyaan guzar gai hain tire intizaar mein

ek muddat se niind taari hai
ek muddat se so nahin paae