ulfat to dekhiye miri didaar ke sabab — Mahwar Sirsivi

vo apne ‘abd-e-haqiqi ko aazmaataa hai
har ik bashar kaa yahaan imtihaan nahin hotaa

vaqt ke paanv bhi nahin mehvar
aur raftaar bhi ghazab ki hai

ghaur se dekhnaa hanste hue chehre ki taraf
ek manzar pas-e-manzar kai manzar degaa

aaj gar bole nahin haq baat par
kal sitam honge tumhaari zaat par

kuchh to khayaal kar miri umr-e-daraaz kaa
sadiyaan guzar gai hain tire intizaar mein

ek muddat se niind taari hai
ek muddat se so nahin paae

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein kaamyaab honaa bhi
ik hunar hai koi mazaaq nahin

dil ke dariyaa ne kinaaron se mohabbat kar li
tez bahtaa hai magar kam nahin hone paataa

shauq hai tujh ko zamaane mein tiraa naam rahe
aur mujhe Dar hai mohabbat miri bad-naam na ho

kabhi tegh-e-tez supurd ki kabhi tohfa-e-gul-e-tar diyaa
kisi shaah-zaadi ke ishq ne miraa dil sitaaron se bhar diyaa