dil par pahan liyaa hai vo gajre ke jaisaa shakhs — Muneer Jafri

Tiis uTThi thi kahin zer-e-zamin aur idhar
shahr kaa shahr makaanon se nikal aaya thaa

— Muneer Jafri

ye vaqt kaifiyaat se bhartaa nahin kabhi
ye jaam ikhtiyaar nahin kar rahaa huun main

— Muneer Jafri

ye chal-chalaav main ne diyaa hai use 'munir'
duniyaa pe inhisaar nahin kar rahaa huun main

— Muneer Jafri

aavaaz ko ghubaar nahin kar rahaa huun main
maahaul daagh-daar nahin kar rahaa huun main

— Muneer Jafri

dariyaa se to muaahida tai paa gayaa magar
kashti kaa eatibaar nahin kar rahaa huun main

— Muneer Jafri

mujh ko faqat shajar ki numu se hai vaasta
sahraa ko saaya-daar nahin kar rahaa huun

— Muneer Jafri

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal