dil-e-haris hi apnaa na ho sakaa qaane — Soz Hoshiarpuri

ek parda saa hai fareb-e-nazar
ye bhi uTThe to dekhnaa kyaa hai

pas-e-murdan bhi musht-e-khaak mein kaisi ye vahshat hai
uThaa karti hai aandhi ban ke khaak-e-raaegaan meri

piine ko yuun to shaikh bhi tayyaar hain magar
kahte hain shart ye hai girah se na zar khule

jise samjhaa hai tu ai sang-dil mai-khvaariyaan meri
tire khalvat-kade mein hain vo shab-bedaariyaan meri

dil miraa dard ke sivaa kyaa hai
ibtidaa ye to intihaa kyaa hai

main ne har takhrib mein dekhi hai ik taamir bhi
meraa miT jaanaa bhi hai himmat-fazaa mere liye

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

itnaa hairaan na ho meri anaa par pyaare
ishq mein bhi kai khuddaar nikal aate hain

mujh se kab us ko mohabbat thi magar mere baad
us ne jis shakhs ko chaahaa vo mire jaisaa thaa

is se pahle ki ye aazaar gavaara kar lein
aa miri jaan mohabbat se kinaara kar lein

tamaam ishq ki mohlat hai is aankhon mein
aur ek lamha-e-imkaan bhi ziyaada nahin