hazaar shama farozaan ho raushni ke liye — Nushur Wahidi

duniyaa ki bahaaron se aankhein yuun pher liin jaane vaalon ne
jaise koi lambe qisse ko paDhte paDhte uktaa jaae

— Nushur Wahidi

khaak aur khuun se ik shama jalaai hai 'nushur'
maut se ham ne bhi sikhi hai hayaat-aaraai

— Nushur Wahidi

diyaa khaamosh hai lekin kisi kaa dil to jaltaa hai
chale aao jahaan tak raushni maalum hoti hai

— Nushur Wahidi

sarak kar aa gaiin zulfein jo in makhmur aankhon tak
main ye samjhaa ki mai-khaane pe badli chhaai jaati hai

— Nushur Wahidi

qadam mai-khaana mein rakhnaa bhi kaar-e-pukhta-kaaraan hai
jo paimaana uThaate hain vo tharraayaa nahin karte

— Nushur Wahidi

aghyaar ko gul-pairahani ham ne ataa ki
apne liye phulon kaa kafan ham ne banaayaa

— Nushur Wahidi

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti

maarka garm to ho lene do khun-rezi kaa
pahle shamshir ke niche hamin jaa baiTheinge

— Mir Taqi Mir

shikva-e-zulmat-e-shab se to kahin behtar thaa
apne hisse ki koi shama jalaate jaate

— Ahmad Faraz