vo na aaegaa hamein maalum thaa is shaam bhi — Parveen Shakir

main sach kahungi magar phir bhi haar jaaungi
vo jhuuT bolegaa aur laa-javaab kar degaa

vo kahin bhi gayaa lauTaa to mire paas aayaa
bas yahi baat hai achchhi mire harjaai ki

laDkiyon ke dukh ajab hote hain sukh us se ajiib
hans rahi hain aur kaajal bhigtaa hai saath saath

tujhe manaaun ki apni anaa ki baat sunun
ulajh rahaa hai mire faislon kaa resham phir

tu badaltaa hai to be-saakhta meri aankhein
apne haathon ki lakiron se ulajh jaati hain

ab to is raah se vo shakhs guzartaa bhi nahin
ab kis ummid pe darvaaze se jhaanke koi

jinhein ye fikr nahin sar rahe rahe na rahe
vo sach hi kahte hain jab bolne pe aate hain

unhein kyaa fikr ki puchhein dil-e-bimaar kaa haal
be-niyaazaana vo andaaz-e-sukhan hai ki jo thaa

apnaa apnaa zauq-e-talaf hai apni apni fikr-e-nazar hai
har manzil anjaam-e-safar hai har manzil aaghaaz-e-safar hai

lauT gae sab soch ke ghar mein koi nahin hai
aur ye ham ki andheraa kar ke baiTh gae hain

kis ke chehre se uTh gayaa parda
jhilmilaae charaagh mahfil ke

khubsurat hain aankhein tiri raat ko jaagnaa chhoD de
khud-ba-khud niind aa jaaegi tu mujhe sochnaa chhoD de