aghyaar ko gul-pairahani ham ne ataa ki — Nushur Wahidi

hazaar shama farozaan ho raushni ke liye
nazar nahin to andheraa hai aadmi ke liye

khaak aur khuun se ik shama jalaai hai 'nushur'
maut se ham ne bhi sikhi hai hayaat-aaraai

diyaa khaamosh hai lekin kisi kaa dil to jaltaa hai
chale aao jahaan tak raushni maalum hoti hai

sarak kar aa gaiin zulfein jo in makhmur aankhon tak
main ye samjhaa ki mai-khaane pe badli chhaai jaati hai

qadam mai-khaana mein rakhnaa bhi kaar-e-pukhta-kaaraan hai
jo paimaana uThaate hain vo tharraayaa nahin karte

duniyaa ki bahaaron se aankhein yuun pher liin jaane vaalon ne
jaise koi lambe qisse ko paDhte paDhte uktaa jaae

jab ki pahlu se yaar uThtaa hai
dard be-ikhtiyaar uThtaa hai

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

jo ghair the vo isi baat par hamaare hue
ki ham se dost bahut be-khabar hamaare hue

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi