kar liije 'raziya' se mohabbat ham par kiije nazr-e-karam — Raja Mehdi Ali Khan

jab apnaa dukh sunaaun qamar ke pidar ko main
kahte hain dekh aag lagaa dungaa ghar ko main

— Raja Mehdi Ali Khan

vo sab aa ke izhaar-e-maatam kareinge
vo baiThak mein roeinge chaae piyeinge

— Raja Mehdi Ali Khan

buri buri nazrein chehre par Daal rahe hain uf tauba
ham apne donon gaalon ko jaa ke abhi dho aaeinge

— Raja Mehdi Ali Khan

bismillaah are-vaah main qurbaan main qurbaan
kyaa khuub lagi hai kamand allaah tiri shaan

— Raja Mehdi Ali Khan

pahle ham ko bahan kahaa ab fikr hamin se shaadi ki
ye bhi na sochaa bahan se shaadi kar ke kyaa kahlaaeinge

— Raja Mehdi Ali Khan

main tum pe huun 'jaan-nisaar-akhtar' qasam hai 'munshi-fidaa-ali' ki
bahut dinon se main tum pe 'saahir' se jaadu Tone karaa rahaa huun

— Raja Mehdi Ali Khan

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh