Mohabbat

ye jannat mubārak rahe zāhidoñ ko
ki maiñ aap kā sāmnā chāhtā huuñ

sau sau umīdeñ bañdhtī hai ik ik nigāh par
mujh ko na aise pyaar se dekhā kare koī

dil meñ na ho jur.at to mohabbat nahīñ miltī
ḳhairāt meñ itnī baḌī daulat nahīñ miltī

hamārī baat mohabbat siiñ tum jo gosh karo
to apnī prem kahānī tumheñ sunā.ūñgā

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

maanā jīvan meñ aurat ik baar mohabbat kartī hai
lekin mujh ko ye to batā de kyā tū aurat zaat nahīñ

tirī abrū hai mehrāb-e-mohabbat
namāz-e-ishq mere par huī farz

rahegā saath tirā pyaar zindagī ban kar
ye aur baat mirī zindagī vafā na kare

shahr-vāloñ kī mohabbat kā maiñ qaa.el huuñ magar
maiñ ne jis haath ko chūmā vahī ḳhanjar niklā

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

vo jis ghamanD se bichhḌā gila to is kā hai
ki saarī baat mohabbat meñ rakh-rakhāv kī thī

ab us kī diid mohabbat nahīñ zarūrat hai
ki us se mil ke bichhaḌne kī aarzū hai bahut

tū mohabbat se koī chaal to chal
haar jaane kā hausla hai mujhe

uThā sakte nahīñ jab chuum kar hī chhoḌnā achchhā
mohabbat kā ye patthar is daf.a bhārī ziyāda hai

bharī bazm meñ raaz kī baat kah dī
baḌā be-adab huuñ sazā chāhtā huuñ

phūñkā hai kis ne gosh-e-mohabbat meñ ai ḳhudā
afsūn-e-intizār tamannā kaheñ jise

kyā isī bhuul ko kahte haiñ mohabbat kā zavāl
ab mujhe yaad nahīñ sālgirah bhī terī

us ke yuuñ tark-e-mohabbat kā sabab hogā koī
jī nahīñ ye māntā vo bevafā pahle se thā

jo ġhazal aaj tire hijr meñ likkhī hai vo kal
kyā ḳhabar ahl-e-mohabbat kā tarāna ban jaa.e

mohabbat ke liye dil DhūñDh koī TūTne vaalā
ye vo mai hai jise rakhte haiñ nāzuk ābgīnoñ meñ