rakhnaa hamesha yaad ye meraa kahaa huaa — Rana Gannauri

khud taraashnaa patthar aur khudaa banaa lenaa
aadmi ko aataa hai kyaa se kyaa banaa lenaa

— Rana Gannauri

tumhaari raah mein aankhein bichhaae baiThaa huun
tumhaare aane ki haalaanki koi aas nahin

— Rana Gannauri

zindagi kaa bhi kiyaa bharosaa hai
zindagi ki qasam bhi kyaa khaaun

— Rana Gannauri

hamaaraa dil to gham mein bhi khushi mahsus kartaa hai
vahi mushkil mein rahte hain jo gham ko gham samajhte hain

— Rana Gannauri

har ik ki hai pasand apni har ik kaa hai mizaaj apnaa
vafaa mujh ko pasand aai pasand aai jafaa us ko

— Rana Gannauri

tumhein ai kaash koi raaz ye samjhaa gayaa hotaa
agar sunte to kahne kaa saliqa aa gayaa hotaa

— Rana Gannauri

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

koi viraani si viraani hai
dasht ko dekh ke ghar yaad aayaa

— Mirza Ghalib

tumhaari yaad nikalti nahin mire dil se
nasha chhalaktaa nahin hai sharaab se baahar

— Faheem Shanas Kazmi

un ki yaad mein bahte aansu khushk agar ho jaaeinge
saat samundar apni khaali aaankhon mein bhar laaungaa

— Sadiq