kaaT aagaahiyon ki fasl magar — Sadiq

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

fursat ho to ye jism bhi miTTi mein dabaa do
lo phir main zamaan aur makaan se nikal aayaa

apne gale pe chalti chhuri kaa bhi dhyaan rakh
vo tez hai yaa kund zaraa dhaar dekh le

gumaan na thaa ki lifaafe mein khat ke badle vo
lahu-luhaan taDapti zabaan rakh degaa

un ki yaad mein bahte aansu khushk agar ho jaaeinge
saat samundar apni khaali aaankhon mein bhar laaungaa

is ghumti zamin kaa mehvar hi toD do
be-kaar gardishon pe khafaa ho rahe huun kyuun