uThaa hi laayaa sabhi raaste vo kaandhon par — Sadiq

fursat ho to ye jism bhi miTTi mein dabaa do
lo phir main zamaan aur makaan se nikal aayaa

apne gale pe chalti chhuri kaa bhi dhyaan rakh
vo tez hai yaa kund zaraa dhaar dekh le

kaaT aagaahiyon ki fasl magar
zehan mein kuchh nae savaal ugaa

gumaan na thaa ki lifaafe mein khat ke badle vo
lahu-luhaan taDapti zabaan rakh degaa

un ki yaad mein bahte aansu khushk agar ho jaaeinge
saat samundar apni khaali aaankhon mein bhar laaungaa

is ghumti zamin kaa mehvar hi toD do
be-kaar gardishon pe khafaa ho rahe huun kyuun

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

dil jo ummid-vaar hotaa hai
tir-e-gham kaa shikaar hotaa hai

khvaab, ummid, tamannaaein, taalluq, rishte
jaan le lete hain aakhir ye sahaare saare

insaan ki niyyat kaa bharosa nahin koi
milte ho to is baat ko imkaan mein rakhnaa

koshish bhi kar umiid bhi rakh raasta bhi chun
phir is ke baa'd thoDaa muqaddar talaash kar