baaton mein hai us ki zahr thoDaa — Saleem Shahzad

havaa ki zad mein patte ki tarah thaa
vo ik zakhmi parinde ki tarah thaa

— Saleem Shahzad

an-kahi kah an-suni baatein sunaa
rah gayaa jo kuchh bhi sochaa soch le

— Saleem Shahzad

zard patte mein koi nuqta-e-sabz
apne hone kaa pataa kaafi hai

— Saleem Shahzad

use pataa hai ki rukti nahin hai chhaanv kabhi
to phir vo abr ko kyuun saaebaan samajhtaa hai

— Saleem Shahzad

aag bhi barsi darakhton par vahin
kaal basti mein jahaan paani kaa thaa

— Saleem Shahzad

vahm o khirad ke maare hain shaayad sab log
dekh rahaa huun shishe ke ghar chaaron or

— Saleem Shahzad

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

— Riyaz Khairabadi

zindagi zor hai ravaani kaa
kyaa thamegaa bahaav paani kaa

— Abdul Hamid Adam

aae kuchh abr kuchh sharaab aae
is ke baa'd aae jo azaab aae

— Faiz Ahmad Faiz